Arsenal hmaah Man United an tlu! A tawp niah champion a chiang dawn

Premier League hmahruaitu chu Arsenal an ni leh rih, hma an hruai theih nan hian Manchester United chu Old Trafford-ah ngei mai Leandro Trossard-a goal khat hmangin 1-0 in an hneh a, match 37 aṭangin point 86 nen a chung berah an awm.

Zanin dar 12:30 hian Manchester City chuan Tottenham Hotspur an tlawh dawn. Pep Guardiola naute hi an chak a nih chuan Arsenal nek chhuakin a chung berah an lawn kai leh nghal ang. Kar tawpah match hnuhnung ber an khel zui dawn, chumi hunah chuan champion a chiang ang.

Gunners hian Everton an mikhual dawn a, champion lai Man City hian West Ham an mikhual ve thung ang - champion tur hi point chauh pawh ni loin, goal difference hmanga en pawh a ngai hial mai thei, chutiang khawp chuan an inhnaihchilh a ni.

Old Trafford-ah chuan

Erik ten Hag-a'n damkawr Lisandro Martinez a la chhawr ngam lo a, tlarhnung laiah kum 36 mi Jonny Evans leh Casemiro te a dah, captain Bruno Fernandes leh forward Marcus Rashford te chu an dam chian loh avangin squad-ah telh an ni lo bawk.

Rawlthar Amad Diallo leh Kobbie Mainoo ten bula an ṭan a, tawnhriat ngah leh Man United thisen ṭhan hnan tawh Scott McTominay chuan captain armband hreng chungin a rawn ho bawk a, striker Rasmus Hojlund thlawp turin Alejandro Garnacho chu a sir lamah a awm.

Mikel Arteta-a'n a duh ang takin a team a rem thei. Contract ziak hlim Jorginho aiin Thomas Partey a ring zawk a, ani hian Declan Rice leh Martin Odegaard te a thlawp a, an hnungah William Saliba leh Gabriel te an awm thung.

Tlan chak Gabriel Martinelli aiin Trossard chu hmun pek a ni a, a laiah Kai Havertz awmin mual sir lehlam chu Gunners fapa rangkachak Bukayo Saka tan a ni thung a, substitute bench lamah Gabriel Jesus dah a ni.

Laipui puak

Arsenal lamin ni danga an khelh ang bawkin a tirah goal khung nghal an tum a, na takin an nawr nghal. Mahse, ball an inpek sual karah Hojlund chu hun ṭha nei hmasa a ni a, goal khung theihna tur remchang nei mah se goal chhungah a pet thei lo a ni.

Man United goalkeeper Andre Onana ball pek chhuah chu Gunners lamin an vaw let thut, tlarhnung laia awm Casemiro a tawlh hma ve hman loh avangin Havertz chu a offside lo a, a sir aṭanga a ball lakluh chu Evans-a'n a lo dang thei tawh lo.

Box chhungah Casemiro leh Aaron Wan-Bissaka ten Trossard an veng tawk lo a, Belgian forward hian hnai tak maiah Havertz-a ball pek chu a lo pet lut zauh a, keeper Onana tan dan ngaihna a awm tawh lo, chiang takin a lut.

Goal an neih hnuah Arteta-a'n khung belh ai chuan venhim a thlang zawk, an nawr na chhunzawm lo. Man United hmatawng hlauhawm ber tur Garnacho-a'n goal zawnah a pet thei lo a, keeper David Raya tan hna hautak an siam thei lo a ni.

United boruak

Hliam vangin player an chan nasa a, coach Erik tan Hag tan pawh tun season zet chu a luhai thlak hle ang tih a chiang. Ten Hag chuan, "Tun ṭumah khan inkhel bul ṭan ṭhin zinga pasarih chu hliam vangin an khel thei lo.

"Chutiang chung chuan Premier League team ṭha berte zinga mi Arsenal lakah khatiang khan kan khel thei," tiin harsatna karah pawh an khel ṭha pangngai viauah a ngai a, mual laia kum 19 mi Mainoo che vel khan United ṭantute beiseina a siamsak a rinawm.

Amaherawhchu, tun hma khan Sir Alex Ferguson chuan inhliam chu infiamnain a khel tel a nih thu leh, chhuanlam atan hman a rem loh thu a lo sawi tawh - mahni player neih ang tawk hman thiam leh result neih pui a pawimawh tihna a ni.

EPL-ah chuan United tan beisei leh tur dang a awm tawh lo tia sawi theih a ni. Chutihrualin, inelna dang FA Cup final an lut thung a, league lamah khel ṭha lo mah se nomawi nena season khar thei dinhmunah an la ding ve leh tlat.

Arsenal leh Beiseina

Premier League season kal laiah Arsenal hi vawi 27 an chak tling ta, season khat chhunga league match bika an chak tam ber ṭum an tawng - kum 2003-04 season khan vawi 26 an chak, an record hi an rawn khum ta chiah.

Old Trafford bikah pawh league match khel tura an lenluh hnuhnung 16-ah vawi khat chiah an chak a, tunah an chak nawn leh ta chiah. Sulhnu ṭha an hnutchhiah mek a, a pawimawh ber 'nomawi' erawh chawi lo thei reng an la ni - Manchester City kutah zawk a la awm.

Mikel Arteta chuan, "Tunah chuan kawngka dang kan hawn belh leh ta, a tawp nia engkim chingfel turin kawng kan hawng a ni. Keimahni khelmualah ngei, min ṭantute leh kan chhungte hmaah Premier League nomawi chawi tumin kan bei dawn.

"A tawp khar ni hi ka nghakhlel tawh hle a ni," a ti. Gunners manager hian Tottenham leh Manchester City inkhel tur pawh an ngaihven tih a sawi a, EPL-ah chuan eng team mai pawh inhneh tawn thei vek an nih thu a sawi.