A fawng chelhtu Man City
Pep Guardiola enkawl Manchester City hian league harsa tia sawi ṭhin Premier League hi an hnehsawh riau mai a, an nomawi humhim tur pawhin midang result an ngaihchan tel a ngai lo - Tottenham leh West Ham an hneh leh chuan an tan a tawk.
Spanish manager Pep-a hian 2016 aṭang khan Man City a enkawl a, vawi nga a champion tawh - a vawi rukna tur pawh a hnai leh tawh vet vet hle, chutihrualin Spurs leh Hammers hi awlsam taka nuai liam ngawt theih erawh an ni bik lo ang.
Erling Haaland, Kevin de Bruyne, Phil Foden, Bernardo Silva leh Rodri te an dam ṭha a, anni hi tawnhriat ngah leh champion dan thiam, a ngaihna hria vek an ni. Nomawi chawi lama tluang tak mai Julian Alvarez an la nei tel bawk.
Hei erawh hriat a ngai - Man City hian EPL bikah Tottenham an tlawh hnuhnung paliah chak ni hmel an hmu lo, an tlawm fai vek - goal an khung miah lo bawk. An tan chuan Tottenham khelmual hi inkhelh harsatna hmun tiin a sawi theih.
Pep Guardiola-a'n a enkawl chinah Manchester City hian Spurs hi vawi ruk an ngam lo tawh a, an chak loh tamna ber an ni. An nomawi humhim tur chuan hna hautak ve tak mai an thawh a ngai dawn tihna a ni.
Chutihrualin, Spurs hian season bul ṭan fuh mah se tun hnaiah an zuih hle. Ange Postecoglou-a naute hian a zawnin - Newcastle, Arsenal, Chelsea leh Liverpool te an hneh lo vek, an match hnuhnung berah erawh Burnley an hneh ve leh tawh thung.
Spurs manager Postecoglou chuan, "He hmunah hian match zawng zawngah ka theihna sang ber hlan turin ka lo kal, club tan a ṭha thei ang bera hna thawh chu ka duh dan a nih bakah ka mawhphurhna sang ber a ni tel bawk.
"Kan match hmabakah hian chak vek ka duh, chumi tur chuan theihtawp kan chhuah dawn a ni," a ti. Spurs manager hian a rilru tak tak a sawi em tih erawh hriat a ni tawh lo, khelmual chhunga a naute chet danin a ti fiah ang.
Tottenham tan zanin hi tun season chhunga anmahni khelmuala an match hnuhnung ber a ni dawn, mualpho chunga hun tawp hman an duh kher lo ang - EPL tawp niah chuan tla chiang tawh Sheffield United khelmualah an leng lut dawn a ni.