Zing dar 7:30-ah Mizoram Vs Maharashtra

Swami Vivekananda U-20 Men's National Football Championship-ah Mizoramin bul an ṭan ṭha a, Pathianni khan Meghalaya 5-0 in an sawp. Tukin zing dar 7:00 hian Ramakrishna Mission Ashrama Ground-ah Mizoramin Maharashtra an hmachhawn ang.

Maharashtra hian an match hmasa berah Rajasthan 2-1 in an hneh lo a, Mizoram laka an tlawm leh chuan besei tur an nei tawh lo ang. Group F-ah Mizoram, Meghalaya, Rajasthan leh Maharashtra te an awm a, pakhat chauhin quarterfinal an lut dawn.

Mizoram coach HC Zarzoliana chuan, "Kan inbuatsaihna a ṭha a, kan inringtawk hle. Meghalaya laka kan khelh danah duhthusam loh lai te chu awm bak mah se kan khelh dan a lungawi thlak. Maharashtra lakah pawh chak turin harsatna kan neih ka ring lo," tiin Vanglaini a hrilh a, Mizo mipuite ṭawngpuina a ngen tel bawk.

Inkhelhna hmun hi Ramakrishna Mission Ashrama Ground hi artificial turf a ni a, RG Stadium-a training ṭhin Mizoram team-in nuam sa takin an khelh theih phah. Santosh Trophy-a Mizoram winger pahnih Lalthankima leh Sawma Tlangte te mualsirah awm leh ve vein an hmuhnawm dun hle.

Ainawn tlangval Thathana hian a theihna sang tak a lantir a, goal hmahruai khung tura a ball la thla phei chu pui tak a ni. Meghalaya player-ten Thathana an chelh zo lo a, Mizo player an ngam lo. Thathana'n hattrick a siam bakah Lungdai rawlthar Lalngaihsaka leh Kawnpui rawlthar C. Zomuanpuia ten goal khat ve ve an khung.

Mizoram tana goal khungtu pathum hi Aizawl FC Academy aṭanga inzir chhuak vek an ni a, tun ṭuma jersey no. 10 hatu Ngaihtea hi en bik tlak a ni a, hmabak a nei êng hle.

Swami Vivekananda U-20 NFC match zawng zawng hi Indian Football YouTube Channel-ah en theih a ni.