SYS aiin Project Veng dinhmun a ṭha

Nimin khan MPL11 Playoff first leg chu RG Stadium, Mualpuiah khelh a ni a, Lunglei club SYS FC leh Kolasib club Project Veng FC te 2-2 in an inhnehtawk. Playoff-ah hian away goal rule hman a nih avangin Project Veng dinhmun a ṭha hret a; May 15, Nilainia second leg an khelh hunah 0-0 emaw 1-1 emawa an inhnehtawk chuan Kolasib club hi an chak ang.

First half-a goal a luh loh hnuin MPL11 Qualifier-a pahnihna SYS FC-in Andreas Lalhmingmuana Vanhawi hmangin goal an khung hmasa zawk. MPL10 khel Project Vengin Jehova Lalthansanga leh Lalrokima te hmangin an lehthal a, minute 90-ah pawh 2-1 a ni.

Mahse, injury time-ah SYS tan Joel Lalramengmawia'n a khung leh a, 2-2 in inkhel a tawp. SYS dinhmun chhe hret mah se Joel-a goal vangin MPL khelh theihna kawng zau zawkin a inhawng a, Project Veng hneh thei turin an inringtawk bawk ang. Chutihrualin naupang rual awm khawmna SYS tan kum lama upa zawk Project Veng hneh hi thil awl a ni dawn lo.