Silly Point : Final leh Nal lo

CYMA leh CYMA buatsaih 12th Inter Branch YMA Cricket Tournament 2024 chu kan lo khel zo leh ta. Tun dinhmunah zawng, Mizoram Cricket khawvelah hian Ramhlun Venglai dang zo reng an awm hrih lo. Zep thu a awm lo a, anmahni hnai ber tur leh lallukhum chhuhsak thei deuh ber tur awmchhun Durtlang pawh hian an ne hi an ek pha hrih lo a ni.

Navratilova vs Evert

Khawvela sporting rivalry ngaihawm bera zinga chhal chu 70s/80s chhova Martina Navratilova leh Christ Evert-i ten Lawn Tennis Grand Slam final-a thiam zawk nih an inchuh hunlai kha a ni.

Martina Navratilova kha final a nih meuh kha chuan a chungnung leh zawk nge nge ṭhin. Khamite hunlai ang chiah khan, Ramhlun Venglai hian final-a Durtlang hneh hi an thiam riau a, Durtlang lam hian Ramhlun Venglai kulhpui sah hawnna tur password hi an la hrefuh hlethei lo chu a ni e.

Khel ropui aiin tisual tlem zawk zawk

Infiamna zir mite leh mi thiam zawkte chuan, a bik takin final leh inkhel stage sang a, champion ṭhin te champion-na chhan ber hi an zirchian hnuah skills, technique, tactic etc te hi chuan 20 % chauh a contri an ti.

Chuta a chhan bulpui ber chu an khel ropui takzet tih emaw, an che ṭha lutuk tih lam aiin, thil tisual tlem tlem, a sap ṭawng takin 'error' nei tlem zawk zawk hi an lo dingchang ṭhin a ni. Racquet leh bat hmanga infiamnaah ngat phei chuan, 90 % a ni an ti mauh mai.

Tisual tlem Ramhlun Venglai

An bowler-ten ball chhia an vawm tlem a, extra an pe meuh lo a, an batsman-ten dot ball an nei tlem a, Durtlang lamin over 20 an vuak chhungin dot ball 54 an nei a. Chumi awmzia chu over kua chu engmah loah an chantir tihna a ni ber chu.

Tin, inkhel dinhmun thlak thei tur, Ramhlun Venglai thiampuipa leh kaptan Joseph Lalthankhuma'n run nga lek a siam laiin, cricket-ah chuan sitter an tih, catch tur an han thlauh leh palh zeuh nen. Batsman ṭhate hian lehlam pawlte hi inkhel vawi khatah hian chance tam hi an pe ngai meuh lo a, an chance pek chhun hi an tumpuiten kan lo lak chat loh chuan, a pawi thui tlangpui.

Chu ngei chu Durtlang fielders naupangte, hmabak la êng tak te khan, an damchhung zirlai pawimawh tak an theinghilh tawh loh tur, a practical-in an zir kan ti thei ang. Team ṭha zawk Ramhlun Venglai an champion a, team ṭha tak Durtlang erawh hmasawnna tur an la nei tiin khar mai ang.

IPL Lamtluang

A hmawr kan bawk hnai tulh tulh a, chiang lo hlirin kan la khat. Round 14 inkhel kual turah, an round hnuhnung ber ṭheuh khelh kar kan lo chuangkai ta a, final round thlengin playoffs lut thei turin team 10 zinga 8 vel chuan an inchuh chho dawn a nih hmel.

Punjab Kings, Gujarat Titans leh Mumbai Indians te erawh uiawm takin kan bye bye thei ta. Kolkata Knight Riders erawh playoff ticket an book thei tawh a. A tira kal vung tak, playoff ticket book hmasa ber tura ngaih Rajasthan Royals erawh a tawp lamah petrol tlankang ang main an khawsa a, mak deuh maiin Lucknow Giants leh Royal Challengers Bengaluru ten playoff an rawn thleng nulh thei bawk. A hmuhnawm chho zel e.