A tawp nan PSG khelmualah Mbappe-a'n goal a khung

Season thara Paris St-Germain a chhuahsan tur thu sawitu Kylian Mbappe chuan French club khelmual Parc des Princes-a an jersey a hak hnuhnun berah goal a khung a, mahse, goal thum an chhuah zui avangin Toulouse lakah 3-1 in an tlawm.

Mbappe-a'n a duhthusamin PSG a thlah thei lo - league nomawi chawi mah se, a home match tawp berah an chak zo lo a, a chawi châk em em Champions League nomawi chawi loin French club hi a thlah liam ta bawk.

Real Madrid lam pan tura sawi Mbappe hian minute riatna lekah goal hmahruai a khung a, mahse, mikhual Toulouse hian Thijs Dallinga hmangin first half-ah si phurh an sut a, Yann Gboho leh Frank Magri ten second half-ah khung belh zuiin, 3-1 in an chak.

PSG hi an match hnuhnung pathumah an tlawm vek - Champions League semifinal-ah a zawnin Borussia Dortmund an hneh lo a, league nomawi an chawi zanah an tlawm leh ta bawk!

Mangṭha Mbappe

French forward hi season tawp ruala a chhuah hi chu mi zawng zawng rin dan sa a ni a, mahse, amah ber hian thu leh hla a neih loh reng hnuin, kar hmasa lawk khan social media kaltlangin PSG a chhuahsan tur thu a sawi.

Mbappe chuan, "A hun a thlen hunah chuan ka hma hun ka tichiang ang tiin ka sawi fo ṭhin. Tun season hi PSG-a ka hun tawp tur a ni a, contract thar ka ziak dawn lo a, rei lotêah PSG-a ka hun hman chu a tawp dawn a ni," a ti.

BBC chuan French forward hian Real a zawm ngei dawn niin an sawi a, Spanish champion-ah hian kum nga chhung khel turin contract a ziak dawn - Jude Bellingham leh Vinicius Junior te nen an khel ho dawn tihna a ni a, an nep lo ang!

Kum 25 mi forward hian kum 30 a tlin thleng chu Real-ah hun a hmang dawn tihna a ni a, rawlthar ṭhangduang tia sawi ṭhin striker kha tunah chuan striker puitling tak tak a lo ni ta.

A la tawp lo

Mbappe hian tun season inelna hrang hrangah PSG tan match 47 khelin goal 44 a khung a, assist vawi 10 a nei bawk - hei aia ṭha zawka season khar theih dan erawh a la nei tih hriat a ṭha.

France tan vawi 77 inlana goal 46 khungtu hian PSG tana a home match hnuhnung ber a khel a ni mai a, Paris club hian tun season-ah match thum khelh tur an la hmabak. Mbappe tan goal khung belhna hun a la tam.

PSG hian league match hnih an la khel leh dawn a, French Cup final an la hmabak bawk - Champions League-ah final lut thei ta lo mah se, nomawi langsar pahnih nena season khar thei dinhmunah an la ding tho.

Paris club hian tun season-ah a zawna a vawi thum nan league nomawi an chawi a, Ligue 1 season hnuhnung 11-ah vawi 10 an champion thei. Mahse, an duh ber Champions League an nei thei lo a, Mbappe a chhuak dawn bawk.

Sulhnu & lunglen

August 2017 khan PSG hian AS Monaco aṭangin Mbappe hi an la lut a, a season hmasa berah hian loan-a la zetin, a man atan euro maktaduai 180 an inrem lawk - kum 20 tling lo zinga footballer man to ber a ni a, French forward hian ngaihven a hlawh lehzual hle.

Mbappe hi kum 2021 khan Real nen sawizawm a lo ni tawh a, Spanish La Liga lamah a pem mai rinna a lian hman hle. Mahse, May 2022 khan kum hnih atan contract thar a ziak ta zawk a, a ṭul dan a zira kum khat dang pawhsei theih tura tih a ni tel.

French forward hian thla khatah £4mtd a hlawh nia sawi a ni a, khawvela footballer hlawh hnem ber a ni. Hemi bakah hian contract thar a ziah avangin £100mtd pek a ni bawk - PSG-a cham a thlang leh phawt pawh hi a demawm loh!

Mbappe hian PSG tan season sarih a khelh chhungin season khata goal 20 aia tlem khung a nei ngai lo. PSG tan inelna hrang hrangah match 307 khela goal 256 khungin, assist vawi 108 a nei a, PSG tana goal khung hnem ber record a chelh mek.

Ngai chung zelin...

Season ṭantir khan Mbappe hi PSG nen an buai ve hat - French forward hian a ṭul dan a zira pawhsei tur a contract chu a pawhsei loh tur thu thuneitute a hrilh a, a tana sum tam tak sengtu PSG lamin hei hi an hrethiam lo.

Japan-a pre-season tour nei team-ah pawh thlan a ni lo a, hetihlai hian sum ngah Saudi Pro League club Al Hilal an lo lang zui. Khawvela footballer man to ber ni turin £259mtd a lei an dil a, PSG lamin season thara a thlawna chân ai chuan an phal.

Mahse, Mbappe hian Al Hilal aiawhte a hmu duh lo a, Saudi lama kal tumna a nei lo. Hemi hnu hian first team training a zawm ve leh a, PSG chuan an player nen hian inbiakna ṭha tak an neih thu a sawi.

Mbappe hian February 13 khan PSG president Nasser Al-Khelaifi a hmu a, PSG chhuahsana Real a pan tur thu hi a hrilh - club tana a home match hnuhnung berah a lem chuanna banner lian tak nen fan-ten an thlah a, a tira lungawi lo kha ngai chung zelin an inthlah ta.