Liverpool chak zo lo; zaninah Chelsea leh United

Premier League-a beisei tur nei tawh lo Liverpool chu Thawhṭanni zan khan an inlan a, an mikhualna ramah 3-1 a hma an hruai reng hnuin, Aston Villa nen 3-3 in an inhnehtawk.

Liverpool hian Emiliano Martínez-a own goal hmangin hma an hruai a, Youri Tielemans chuan si phurh hi a sut. Mahse, Liverpool tan Cody Gakpo leh Jarell Quansah ten khung ve lehin, 3-1 a ni a, Reds an chak mai a rinawm hman.

Mahse, Villa tan minute 85 hnu lamah Jhon Durán chuan goal hnih a khung a, 3-3 in inkhel a tawp. Villa tan Champions League a hnai zel a, nizan khan Tottenham Hotspur chuan Manchester City mikhualin, an tlawm chuan Villa hi Champions League khel turin an tling chiang ang - result kan hre hman lo.

Zanin hian inkhel hmuhnawm en tur a awm dawn bawk a, tun hnaia result nei ṭha Chelsea chuan zan dar 12:15-ah Brighton & Hove Albion lenchilhin, Manchester United chuan zan dar 12:30-ah Newcastle United an mikhual dawn bawk.

Beisei tur awm lo

April thlatir kha chuan Liverpool-in nomawi pathum nena coach chhuak tur Jurgen Klopp an thlah tur thu an sawi uar viau a, season tawp a hnaih meuh chuan League Cup-ah bak an champion dawn lo tih a chiang tawh a, Premier League-ah pawh beisei tur a awm lo.

Heti chung hian Villa Park-ah Liverpool-in goal an khung hmasa a, minute hnihna lekah Villa keeper Emiliano Martínez chesualin, Harvey Elliott-a ball cross satliah tak chu an lamah a dang per lut - Villa Park a reh ṭhup.

Mahse, rei lotêah Tielemans inlarin, Belgian midfielder hian ṭha zetin si phurh sutna goal a khung a, an hlim chhung erawh a rei lo. Minute 23-naah Gakpo chuan Reds hma a hruai nawnpui a, second half-ah Jarell Quansah chuan Premier League-a a goal hmasa ber Liverpool tan a khung bawk.

Liverpool hi hahdamin an chak dawn niin a lang hman. Mahse, beisei tur nei lo Reds hmachhawn hi European football beiseitu Villa an ni a, tlawm an duh lo. Bench aṭanga luhtir Duran chuan hun tawp hnaih lamah goal hnih a khung a, 3-3 in team pahnih an inhnehtawk daih.

Ngaihlai Klopp

Liverpool player-ten khelh chhan an nei tawh lo tih a lang chiang a, khelmual sira boruak nei sang ṭhin tak Jurgen Klopp pawh inkhelh chhung zawngin a boruak a 'cool' a, a inhmeh lo letling hle!

Klopp 'cool' chhan langsar tak erawh Villa lakah yellow card hmuh a hlau niin a lang - German coach hian yellow card hmu chiah se, a hmaa a yellow card khawl tawh sa nen Anfield-a a match tawp berah a naute a kaihruai thei dawn lo a, thil duhawm lo thleng thei pumpelh a duh.

Reds hian May 19, Pathianni zan dar 8:30-ah Wolverhampton Wanderers hmachhawnin, Jurgen Klopp-a hnuaia an match tawp ber an khel dawn a, German coach hian, "Wolves nen kan inkhelh hunah ruah sur se ka duh a, chutichuan fan-ten ka mittui tla an hmu thei dawn lo a ni," tiin a lo sawi tawh.

Villa lakah point an hloh chungin Liverpool fans an hnual lo a, an rilru luah bertu chu Premier League team hmuhnawma din lehtu Klopp thlah dan tur a ni - Villa Park-ah pawh German coach fakna an sa dual dual!

Chelsea beiseina

Mauricio Pochettino hoin beiseina sang tak nen Chelsea-in season bul an ṭan a, mahse, an beisei angin thil a kal lo - tluk leh din an an fawm deuh reng a, an player lakluh zozaiten an beisei ang danglamna an thlen thei lo bawk.

Mahse, tun hnaiah Blues hi an insiamṭha tiin a sawi theih a, tun season an hman dan thlirin a daih chen tur erawh sawi thiam a harsa. London club hi an league match hnuhnung paliah an tlawm lo a, pathumah an chak.

Hetihrual hian an league match hnuhnung bera Nottingham Forest an hmachhawn ṭumin, comeback turin hun tawp hnaih lam an nghah a ngai a, vannei ang zawnga thlir tan chuan, "An vannei" tia sawi pawh a awm lo hran lo.

Mahse, tun hnai an result vangin he team hian beiseina thar an nei a, chu chu season thara Europa League emaw Europa Conference League khelh a ni - zaninah an elpui United leh Newcastle an inkhel ve dawn bawk a, Blues tana pawimawh hmasa ber chu zanina Brighton & Hove Albion hneh a ni.

Khawiah nge United?

Season ṭantirah champion an sawi ri a, season laihawlah Champions League - season tawp a hnaih meuh cuan league kaltlanga United beiseina chu Europa Conference League a ni ta. FA Cup final-a Manchester City an hneh erawh chuan Europa League an khel ang.

Chutihrual chuan United hi FA Cup final-a an chak loh chuan, Premier League-a paruknain Europa League an khel dawn - hei hi Chelsea leh Magpies lamin an beisei a ni a, season tawpah thleng thei a la tam hle.

Erik ten Hag-a'n an match tawp berah Arsenal an ngam lo chungin, a player-te khelh dana a lawm thu a sawi a, Sir Alex Ferguson hoa Premier League nomawi chawi ṭhin United fan-te tan Arsenal ngam lo chunga 'infakna' hi pai dam a harsa ang tih a chiang.

Red Devils ṭantuten zanin dar 12:30-ah Newcastle United hneh an beisei dawn a, league lamah beisei tur tehchiam awm tawh lo mah se, an league match hnuhnung pahnihah an chak a nih chuan FA Cup final atan beiseina thar an insiam thei ang.