Mizoram an chak, quarterfinal an hnaih
Swami Vivekananda U-20 Men's National Football Championship-ah Mizoramin match hnihah point ruk an hmu a, quarterfinal lut turin an kutah engkim a awm. HC Zarzoliana enkawl Mizoram hian nimin zing khan Maharashtra chu 3-2 in an hneh a, match hmasa berah Meghalaya 5-0 in an sawp tawh bawk.
Nimin tlai inkhel hnuhnung zawkah Meghalaya-in Rajasthan te 3-2 in an hneh. Group F-ah Mizoramin point ruk a hmu a, Rajasthan leh Meghalaya ten point thum ve ve hmuin Maharashtra-in point an la hmu lo. Mizoram hian Rajasthan laka point an hmuh hrim hrim chuan quarterfinal an lut dawn a, May 16, Ningani zing dar 7:30-ah an khel leh ang.
Player an tat hriam
Mizoram coach Zara'n a naute a ringtawk a, match hnih lekah inelna hmachhawn tura a hruai player 18 a khelh kim tir vek. Chumi awmzia chu Meghalaya sawp ṭuma Mizoram tana bul ṭantu player panga ngawt a thlak.
Goalkeeper Lalhruaitluanga aiah Kolasib rawlthar H. Lalrinzuala luhtir a ni a, defence-ah Laldawngzuala leh Gilbert Lalbiaksanga te aiah Vanlalhriatrenga leh C. Lalmuanzuala te an lut.
Zara'n midfield a khawih che lo a, tlarhma lamah Sawma Tlangte leh Lalrothlanga aiah R. Lalchawikima leh C. Beichhuahmoa te an lut bawk. Bul ṭan nawn thei player-te chu C. Zomuanpuia, Freddy Lalruatkima, Lalngaihsaka, Lalremtluanga (Mamatea), Marcus Malsawmzuala leh Lalthankima te an ni.
A awlsam lo
Mizoram coach Zara'n Maharashtra an hneh ngei a rin thu sawi lawk mah se an khingpui hi an ṭha. Maharashtra hian Rajasthan hneh loin bul an ṭan a, an vanduai vanga chak lo an ni thung.
Ramakrishna Mission Ashrama Ground, Chhattisgarh-a inkhelah Mizoramin goal an khung hma. Minute riatna lekah Mamatea'n freekick mar ṭha takin a pet a, a per chu Marcus-a'n a tauh lut. Zara hote hian goal khung hma mah se inkhel an thunun thei bik lo a, first half-ah goal dang a lut tawh lo.
Second half-ah Maharashtra-in bul an ṭan ṭha zawk a, minute 54-naah an forward chuan box pawn aṭanga pet thutin goal kilah a pet lut. Mizoram keeper Rinzuala positioning a fuh tawk lo.
Sub awmze nei
Mizoramin bench aṭangin Emanuel Lalhruaizela leh Sawma Tlangte te an luhtir a, anni hi danglamna thlentu an ni. Bethlehem Venthlang rawlthar Ema hian box chhunga ball per chu angle zim zet aṭangin a pet lut.
Maharashtra-in an thah a, dinglamah ball vawrhin jersey no. 7-in la lutin a pet goal lehnghal. Mizoram mual vei lam a pawp nawn a, Maharashtra player-ten Mizo player-te tihelin goal khung an lawm bawk.
Mahse, a thiam zawk danglamna a lang. Man of the match-a thlan captain Thathana'n midfielder Ngaihtea tan ball a pe a, Lungdai rawlthar hian Rothlanga pein, ani hian Sawma Tlangte tan a pe. Zobawk tlangval Sawma hian a ke vei lamin (a pet thiam loh lam a ni zawk!) kawh zetin a pet a, Maharashtra keeper-in nam per zo loin goal-ah a lut. Santosh Trophy-a Mizoram senior team tana bul ṭan thei Sawma hian chakna goal a khung.
Dinhmun a ṭha
Mizoram coach Zara chuan, "Player-te an thawkrim a, training-naah an tih ṭhat avangin khelh vek hi an phu. Kan khelh danah insiamṭhat ngai lai a awm a, kan khelh leh hunah insiamṭhat ngei kan tum ang. Hnehna kan chan avangin kan lawm takzet a ni," tiin Vanglaini a hrilh.
Mizoram hi coach Zara bakah manager C. Lalramdinsanga leh assistant coach Laldampuia ten an kaihruai a ni. Mizoram hi quarterfinal lut turin an dinhmun a ṭha a, chutihrualin match tawp ber hi khelh rual tur a nih avangin an vanduai chuan ground chhe zawka khel thei an ni.