Coppa Italia Final: Atalanta vs Juventus

Italian football-a club inelna ngaihhlut hlawh Coppa Italia final chu zanin dar 12:30 hian khelh a ni dawn a, Atalanta leh Juventus ten champion nih an inchuh dawn - a hmuhnawm loh ring suh.

Juventus-in Italian football-ah ro an rel ṭhin a, Serie A-ah pawh season kua zet a zawna lo champion tawh an ni. Mahse, 2020 an champion hnu khan Serie A-ah an la champion leh ta lo a, nomawi hrim hrim an chawi hnuhnung ber pawh 2020-21 season daih kha a ni tawh!

Turin club nomawi chawi hnuhnung ber hi Coppa Italia tho a ni a, an champion lohna a rei tak em avangin champion leh châkin an tuihal. Mahse, an hmaah Europa League final khel tur Atalanta an awm a, a awlsam lo ang.

Atalanta hian thawnthu ropui sawi tur an nei lo. 1962–63 season khan Coppa Italia an champion a, khami hnuah khan nomawi an chawi leh tawh lo! Kuminah nomawi pahnih chawi thei dinhmunah an ding mek a, an club thawnthu her danglam an châk dawn.

Aw nang Juve!

Italian football awp a, an duh zawng apiang player la ṭhin Juve an kun mek a, July 2021 khan coach hlui Massimiliano Allegri chu ko kirin, an ropuina neih let leh an tum a, mahse, Serie A-a season nga zet a zawna lo champion pui tawhtu coach kaihhruaina hnuaiah pawh eng an ang chuang lo.

Allegri hian nomawi 11 zet a lo chawipui tawh Juve hi nomawi a la chawipui leh lo a, club manager hlawhtling ber pawl aṭangin hlawhtling lo langsarah ava inchhuah a ni ber - he hun duhawm lo hi thaibo turin Coppa Italia nomawi chawi an tum ang.

Chutiang tur erawh chuan striker Dušan Vlahović chet ṭhat a ṭul dawn a, ani hian tun season inelna hrang hrangah match 35 khela goal 17 khungin, assist vawi thum a nei a, Federico Chiesa leh Arkadiusz Milik ten mawhphurhna an lak a ṭul bawk ang.

Midfield-ah Adrien Rabiot an neih avangin Juve an ṭha tawk a, Manuel Locatelli an la nei bawk - tlarhnung lam hi tun hma ang emin hmingthang tawh lo mah se, Daniele Rugani, Federico Gatti, Gleison Bremer leh Andrea Cambiaso te an nei a, keeper Wojciech Szczęsny pawh a la rintlak reng.

Atalanta beiseina

Season thara Champions League khelh tum Atalanta-in Europa League final an la hmabak bawk a, an 'puja' fuh lai tak a ni. Heti chung hian an match hnuhnung pangaa vawi li ngawt a naute chakpuitu, Atalanta boss Gian Piero Gasperini a ṭawng uang duh lo.

Gasperini chuan, "Juve laka rin hlawh zawk anga insawi chu a lutuk deuhin ka hria. Tun hnaiah kan khel ṭha ngei a, mahse, ni thum dana inkhel reng kan nih avangin a harsa hle. Final khel turin phur tak erawh chuan kan kal ang," a ti.

Atalanta hian Coppa Italia final lut tur pawh hian semifinal second leg-ah Fiorentina chu 4-1 in an sawp a, an record a nep lo hle. An chet ṭhat chhawm nung a, nomawi an chawi theih nan erawh tun hnaia form em em mai Gianluca Scamacca leh Ademola Lookman chet ṭhat a ṭul.

Scamacca hian tun season inelna hrang hrangah match 40 khelin goal 17 a khung a, assist vawi ruk a nei bawk. Kum 26 mi Lookman a sawi nep theih bik lo - match 41-ah goal 12 khungin assist vawi riat a nei a, player pahnih hi an dah ṭhat theih chuan Juve tan a awlsam sawt ang.