MCL an khel ṭan; Champion lai hnehtu Chhinga Veng

Cricket Association of Mizoram (CAM) hnuaia inelna lian leh ngaihhlut - Mapuia Memorial Mizoram Cricket League (MCL) chu nimin aṭang khan khelh ṭan a ni a, inkhel hmasa berah Chhinga Veng chakin pahnihnaah Ramhlun Venglai an chak bawk.

Suaka Cricket Ground, Sihhmuia inkhelah champion lai Chanmarians chu MCL atana hmun ruak leitu Chhinga Veng chuan run 11-in an hneh. Chhinga Veng tan hian Jehu Anderson chuan ball 50 aṭanga run 72 vaw chhuakin a team a chakpui.

Ṭum vawra vannei zawk Chanmarians lamin vawm hmasak an thlang a, over 20 chhunga run 174 siam tirin wicket nga an la. Chhinga Veng target siam hi a sang pangngai viau - Chanmarians lamin over hmang zoin run 163 bak an tlin ve ta lo a ni.

Inkhel hnuhnung zawkah Ramhlun Venglai lamin vuak hmasa an thlang a, run 139 siamin target an siam sang thei lo. Mahse, run an siam tam loh niah baller an che ṭha ve leh thung, over 17.2 lekah vawm out vekin run 78 bak an siamtir lo; run 61 ngawtin hnehna an la chang phak tho.

Vawiin hian a hmun ngaiah round 1 khelh zawh a ni dawn - chawhma dar 9:00-ah Zarkawt Lords leh Kulikawn inkhelin chawhnu lamah Ṭhuampui Chinari leh Chhinga Veng ten round 2 an khel zui leh nghal dawn a ni.

MCL-ah hian 1st Division Screening Tournament neih zawh taka a sang zual pali - Chanmarians, Kulikawn, Ramhlun Venglai leh Ṭhuampui Chinari te an tling sa a, hmun ruak dang pahnih chu Chhinga Veng leh Zarkawt Lords ten an lei ve thung.

Team paruk te hi vawi khat ṭheuh an inkhel kual vek dawn a, chumi hnuah a sang pali ten knock out stage an khel ang. Ruahman dan chuan May 29, Nilainiah a hmawr bawkna neih a ni ang.