Vawiinah Women's Football Final Chawhnu dar 2-ah Saitual Vs Aizawl

MFA Inter-District Senior Women Football Championship 2023-24 final chu vawiin chawhnu dar 2:00 hian Serchhip Sports Complex-ah champion lai Saitual leh champion rinkai Aizawl ten final an khel dawn. Team ṭha pahnihin final an khelh dawn avangin a hmuhnawm viau tura tura ngaih an ni.

Group A-ah Saitualin an awmpui Lawngtlai leh Hnahthial te hneh ve vein quarterfinal an lut a, knockout stage-ah Champhai leh Kolasib te hneh lehin final an lut. Tun ṭumah hian an champion ṭuma player 14 an la awm a, mi thar paruk an awm belh.

Indian Women's League club Kickstart FC tana khel pha Lalbiakdiki chu an player pawimawh a ni a, Women's League neih zawh taka SYS captain J. Lalparmawii tlarhmaah a pawimawh. Centre back C. Lalhmunsiami hi kum 14 mi chauh a ni a, tlarhnung tichaktu ber a ni tawh.

Saitual team coach F. Vanlaltleipuia chuan, "Champion nawn ngei kan tum. Theihtawp kan chhuah. Keini aiin an ṭha zawk a, kan zam phah loh. Football-ah chuan engpawh a thleng thei a, Pathian thu thu a ni," tiin Vanglaini a hrilh.

An champion hmasak ṭumin Tleipuia hi assistant coach a ni a, tun ṭumah hian head coach niin champion ṭuma coach Lalmuanpuia Hmar chu manager a ni ta thung.

Aizawl team hi SYS coach pahnih R. Lalnunsangi (Manuni) leh Lizzy Lalhmingsangi te an enkawl kawp a, Mizoram enkawl fo tawh an nih avangin player an hre chiang hle.

Final thleng turin Aizawl hian harsatna an tawk lo. Group match-ah Lunglei leh Champhai te awlsam takin an hneh a, quarterfinal leh semifinal-ah Hnahthial leh Khawzawl te an hneh leh bawk.

Aizawl hi Lalrinmuani, Gladys Zonunsangi, Cindy Remruatpuii, C. Zairemmawii leh keeper Baby Zothankhumi te an awm a, an inringtawk hle. Manager Manuni chuan, "Ni thum chauh training-na hun kan neiha vangin game structure kan khawih nghal. Kan khelh danah kan lungawi a, final khel turin kan inpeih e," tiin Vanglaini a hrilh.

Aizawl coach Lizzy chuan, "Lawmna tur ṭhahnem tak a awm. District tinin theihtawp an chhuah a, player thar ṭha tak tak an rawn chhuak. Tun hma ang kha a ni tawh lo a, district hrang hrangah player ṭha hmuh tur a awm. Mizoram hmeichhe football hmasawnna kan hmuh hian kan lawm takzet a ni," tiin a sawi ve bawk.