ISL Team of the Season-ah Lianzuala

Indian Super League Team of the Season puan a ni a, Indian player pali lang zingah Mumbai City forward Lallianzuala Chhangte a tel - vawi hnih a lanna a ni.

Indian player pali zinga pathum hi Mumbai-in an thawh niin, Lza bakah hian goalkeeper Phurba Lachenpa leh Vikram Pratap Singh an lang a, Mohun Bagan captain Subhasish Bose a lang bawk - nomawi chawitu Mumbai aṭanga player langte hi Indian vek an ni tihna a ni.

Lunglei tlangval Lza hian ISL khelh zawh takah khan match 25 khelin goal 10 a khung a, assist vawi ruk a nei bawk. Heng bakah hian a ṭhiante tan goal khungna chance vawi 43 ngawt a siamsak a, Indian player zinga season khat aia tam goal 10 khung thei hmasa ber record a siam. Lza chuan, "Nomawi ber kan chawi a, thil dang hi chu ka rilruah a awm hran lo," tiin Vanglaini a hrilh.