Diakkawn tan Durtlang an awlsam

Ather Pro Volleyball League 2024 khelh laia hmeichhe inelna huangah Diakkawn chuan Durtlang lakah 15-5, 15-7, 15-8, 15-12, 15-10 in hnehna an chang a, an league match hnuhnung berah set hloh miah loin an chak.

Thawhṭanni zan khan LPS Arena, Falkland-ah Diakkawn tan Lalmuanpuii a khel ṭha a, Kolasib club tan point 17 hmuin an chak nan hnar pawimawh a ni a, a vawi hnih nan Kuriz Player of the Match atan an thlang.

Match dang angin Vardingliani a che ṭha tawk lo ve thung, point 10 nei mah se vawi riat ngawt a tisual; setter Lalrinzuali (7-2), VL Hmangaihzuali (6-2) leh Hmingthazuali (4-2) te an khel chhe lo a, thawhhona ṭha hmangin an chak.

Player naupang rual awm khawmna Durtlangin knockout round an lut pha tawh lo tih hre chungin an khel a, an phur lo tih a lang. Bungkawn lakah set hnih laa beiseiawm taka an inlan ang kha an pha lo a, an player zingah hnuhma chhuan tlak nei an awm lo.

Diakkawn tan tawnhriat nei player rualten a tir atangin zangkhai takin an khel a, set khatnaa che ṭha Dingi'n vaw tlain 11-4-in an sang a, 14-4 a nih leh hnua a hlap tla zui leh.

Diakkawnin inkhel awpbet zui zelin set hnihnaah 12-7 a nih aṭangin Durtlangin point an hmuh belh lo a; set thumnaah Muani'n vaw tla zawnin 12-8-in hma an hruai a, lehlam dang betin awlsam takin an tlang leh.

Set linaah Durtlangin hma an sawn hret a, 10-10 a nih hnuah Diakkawn an chungnung leh tho a, Muani vuak an dan theih loh bakah anmahni'n an tisual nasa a, 14-12-a Kolasib team an san laiin Lalrampani'n a service kai lo a ni.

Ṭum danga an innghahna Sarah-i a chet theih loh avangin Durtlang an zuih tluan a, set hnuhnung berah Dingi'n hlap tlain 11-4-in Diakkawn an sang. Nawr letin point 10 thleng hmu ve hman mah se dan zawh lohin Kolasib team an tlang.