Black Cats inkhelin Magpies hmalam hril dawn

Zanin dar 12:15 hian Sta-dium of Light-ah Sunder-land-in Everton an mikhual dawn. Sam Allardyce hoten hnehna an chan chuan Black Cats-in Premier League an khel zel ang a, Newcastle United erawh Championship lamah an tla thla thung ang.

Premier League aṭangin Aston Villa an tla tawh a, club pathum Sunderland, Newcastle United leh Norwich City aṭangin club pakhat an him dawn. Zanin vek hian Norwich City-in Carrow Road-ah Watford an mikhual dawn a, kartawpa Manchester United hneh lotu Canaries hi Sunderland result-ah an innghat.

Chhandamtu Defoe

Sunderland-in Premier League khel zel tura beiseina nung nei turin kartawp khan an mualah Chelsea chu 3-2 in an lehthal a, chakna goal khungtu chu Jermain Defoe a ni. Blues laka point thum hlawhchhuah avangin Black Cats tan him turin point thum hmuh a tawk a, amaherawhchu an khingpui tur Everton hi an chunga awm an ni.

Kum 33-a upa Defoe hian tun season league-ah goal 15 a khung a, English striker zinga ani aia khung tam chu Tottenham forward Harry Kane (25) leh Leicester forward Jamie Vardy (24) te chiah an awm. Pathianni zana Arsenal leh Manchester City inhnehtawk ṭuma Danny Welbeck inhliam leh takah chuan Euro 2016-ah Defoe hian England squad-ah tel theihna chance a nei ve tlat.

Sunderland manager Sam Allardyce chuan, "Inelna sangah pawh Defoe hian goal a khung thei a, Roy Hodgson hian goal a duh chuan Defoe hi a telh a ngai a ni," tiin a striker a fak. Chutihrualin Defoe tan England tana khelh hi a pawimawh ber lo a, tun dinhmunah chuan Black Cats him hi a pawimawh hmasa ber.

Kum 61-a upa English coach chuan, "Everton hi Leicester City laka an khelh dan vangin an sawisel nasa a, chuvangin min hmachhawn hunah insiamṭhat an duh ngei ang. Toffees hian hun hlimawm min hmantir an tum lo. Chuvangin Inrinnia kan inkhelh ang chiahin Everton kan khelh hunah hian kan theihna zawng zawng kan phochhuah a ṭul a ni," tiin inkhelh a awlsam loh tur thu a sawi.

Norwich lam

Norwich supporter-te'n result ṭha an neih loh chhanah sum an hmang tam tawk loah an ngai a, club hotute an sawisel. Manchester United an hneh loh hnuah Norwich City chief executive David McNally-a'n banna a thehlut.

Canaries hian Watford an hmachhawn dawn a, Everton laka Sunderland an chetsual beiseiin Norwich hian chak ngei an tum dawn a ni.