Murray leh coach inṭhen

Kum hnih zet an thawh dun hnuah Andy Murray leh a coach Amelie Mauresmo te chu Thawhṭanni khan an inṭhen. Mauresmo hma hian world number 1 hlui Ivan Lendl kaihruaina hnuaiah Murray hian 2012 US Open leh 2013 Wimbledon nomawi a chawi.

Kum 2014 June thla khan Mauresmo nen hian thawk dun ṭanin Britain number 1 hi tournament pasarihah a champion zui tawh a, heng zingah hian tun hma lama a la hlawhtlin ngai lohna clay court-ah
ṭum hnih a champion nghe nghe. An ram chu Davis Cup title lak pui bawk mah se Grand Slam-ah erawh a champion tawh lo thung.

Mahse, Murray hian tun hnaiah world number 1 Novak Djokovic a hneh theih lo a, ATP ranking chhuak thar berah pawh pahnihna aṭangin pathumnaah a tla hniam.

Facebook-ah Mau-resmo chuan, "Andy nen kum hnih chhung kan thawhdun kha ka tan hun hlu leh hriat reng tawh tur a ni a, a kal lehzelna turah a champion chhoh zel theih nan duhsakna ka hlan e," tiin a sawi.

Murray chuan a coach thlahna thu sawiin, "Amelie lak aṭang khan thil tam tak ka zir a, court chhungah leh pawnah pawh entawn tur tamtak min hnutchhiah. Ka tana a hnathawh zawng zawng avang khan lawmthu ka sawi," tiin a sawi ve bawk.