Italian manager of the year-ah Ranieri

Italian Football Federation chuan kum danga an tih ṭhin angin Italian manager ṭha ber thlanna an nei a, Premier League-a Leicester City champion puitu Claudio Ranieri chu he chawimawina hi pek a ni.

Enzo Bearzot award tia an hming an vuah Italian manager of the year chawimawina hi Thawhṭanni khan Rome khawpuiah sem a ni a, award hi kum 2010-a thi ta, 1982 World Cup-a Italy champion puitu Enzo Bearzot hriatreng nan sem ṭhin a ni.

Ranieri chuan, "Bear-zot hi hmaichhanah ka hmu hman lo a, mah se mi tam takin Bearzot-a thlarau kha keimahah hian an hmu niin an sawi a, chu chuan min ti lawm em em a ni," a ti.

Italian FA president Carlo Tavecchio chuan award sem zanah hian manager of the year atana an thlan Ranieri chu Italy enkawl tura a duh thu sawiin, "Ranieri hian Italy nen World Cup nomawi a chawi theih ngei ka ring a, chu chu tu tan pawh a ṭha a ni," tiin Italian FA leh Ranieri chu thawk dun se an pahnih tan a inchhirawm loh ve ve tur thu a sawi.

Tavecchio chuan sawi chhunzawmin, "Tun World Cup kher hi ka sawi chuang lo a, Claudio hi kum 64 chauh a la nih avangin nakin World Cup ka thlir lawk a ni. Antonio Conte a thlak tura kan ngaihtuah leh ngaihtuah loh inhriat duh chuan - keini hi Ranieri kan duh leh duh loh ngaihtuah tur kan ni lo a, amah zawk hian enkawl tlak kan ni em? tih ngaihtuah zawk tur a ni," tiin Italian manager chu a dah sang hle.