Bundesliga khel tur RB Leipzig - khawvelin a ngaihven!

May 19, 2006-a din, fifth division aṭanga bul ṭan RB Leip-zig chuan an club din a nih aṭanga kum ruknaah German football-a inelna sang ber Bundesliga an khel dawn a, khawvelin he foot-ball club ṭhangduang tak hi a ngaihven nghal a, RB Leipzig hi eng club chiah nge a nih? tih hi zawhna tam tak piang nghal chu a ni.

Tute nge an nih?

Kum 2007 vel daih tawh khan German football-a intahluh tumin Austrian energy drink company Red Bull chuan club lei tur an zawng a, club hming lian leh lar sa lei tur chuan sum tam tak a ngaih bakah a risk a san avangin Red Bull hian division hniam lam aṭanga kalphung pangngai taka bul ṭan chu an duh dan a ni.

Red Bull hian German club neih ngei tumin club hrang hrang dawr kual mah se an beisei ang hlawhtlinna erawh an hmu lawk lo. Team awm sa mai bakah 'playing right' nei sa club kaltlanga an kal a ngaih si avangin a tawpah chuan Leipzig khawpui bula thingtlang khuaa club tenau SSV Markanstadt an dawr fuh a, euro 350,000-a an playing right lei sakin club thar an din ta.

German football kalphungah company hming chawia club kalpui phal a nih loh avangin Red Bull hian hmun danga an tih ṭhin angin an brand hming chu club hmingah an hmang thei lo a, RasenBallsport Leipzig tih hming phuahin kum 2009 khan German football fifth division-ah an inziak lut.

Leipzig zinkawng

Pathianni zan khan RB Leipzig hian season thara Bundesliga khel turin Karlsruhe chu 2-0 in an hneh a, 2.Bundesliga-ah match khat khelh tur la nei mah se pahnihna ni chiang tawhin um phak theih ni tawh loin an chung chiaha awm Freiburg nen season tharah chuan Bundesliga hi an khel dawn a ni.

RB Leipzig hian an club din kum 2009 khan NOFV-Oberliga Sud (fifth division)-ah bul an ṭan a, an season hmasa berah cham-pion nghalin Regionalliga Nord (fourth division) an khel leh.

Fourth division-a kum thum an cham hnuah 2012-13 season khan hneh loh tawng loin fourth division-ah hian an champion a, 3. Liga (third division)-ah an inhlangkai. RB Leipzig-in fourth division lamah an duh aiin hun an hmang rei a, third division-ah kum khat chauh hun an hmang hman tihin pahnihna dinhmun luah chungin 2. Bundesliga (second division)-ah an inhlangkai a, second division-ah hian season hnih chiah hun an hmang hman tihin Bundesliga an khel dawn ta a ni.

Fans nei ṭha

RB Leipzig hi kum ruk kal ta lawka din ni mah se Leipzig khawpui behchhana in kulh an nih avangin an khelmuala an inkhelh apiangin ṭawiawmtu an nei chhe ngai lo.

Kum 2009 khan RB Leipzig-in an khelmuala match an khelh apianga inkhel entu zat chu chawhrualin mi 2,150 an ni a, nikumah erawh home match-a entu zat chu inkhel apiangin mi 25,025 zet an ni tawh.

Leipzig khelmual Red Bull Arena-ah hian mipui 42,959 an leng a, Austrian energy drink company hian an club ṭhan zel dan ngaihtuah chungin mipui 80,000 lenna tur stadium sak tumin ruahmanna an nei nia sawi a ni der tawh - Germany-ah Red Bull ral a lian a nih pawhin a mak lo ang.

Red Bull leh football

Red Bull hian Germany mai ni lo khawvel ram hmun hrang hrangah football club an nei nual a, sumdawnna hlawk tak hmuhin football hi an hmu ngei niin a lang.

Austria Company hian Ma-jor League Soccer lamah Arse-nal legend Thierry Henry leh Mexican legend Rafael Márquez-te pawh an lo khelh tawhna New York Red Bulls an nei a, an ram Austria-ah club hlun leh langsar ber tih ngam FC Red Bull Salzburg an nei bawk.

Red Bull hian Brazilian club RB Brasil an nei bawk a, Brazilian club erawh an beisei angin hma an sawn pui chak tawk lo a, Serie D-ah la khel mekin Africa lamah pawh Red Bull Ghana an nei!