NBA Conference semifinals Curry leh Warriors an kal zel

NBA Western Confe-rence semifinals khelh mekah Golden State Warriors chu final lut turin an dinhmun a ṭha ta. Nimin zing khan Portland Trail Blazers lakah 132-125 a hnehna changin Warriors hian best of seven series-ah 3-1 in hma an hruai. Ningani zing dar 8:00-ah Game 5 an khel leh ang.

Moda Center-a in-khel-ah kar hnih chhung khup dinglam na vanga a inkhelh theih loh hnuah season hnih a zawna MVP ni thei Stephen Curry a rawn kir leh tawh a, point 40 zet rawn score leh nghalin an chak theih nana thawh hlawk ber a ni.

Game 4-ah hian team pahnih an inkhel tawk hle a, quarter lina an khelh zawh thlengin 111-111 a ni a, overtime khelh niin Warriors hian point 21 an luh belh laiin Blazers hian point 14 chauh an hmuh belh thung.

Warriors tan Curry bakah Andrew Bogut leh Draymond Green te an khel ṭha a, Blazers tan Game 3-a point 40 score thei Damian Lillard chuan point 36 zet score lehin assist vawi 10 leh rebound vawi ruk a la bawk mah se midangin an thlawp ṭhat tawk loh avangin an chak zo lo.

Eastern Conference Semifinal lamah Miami Heat chuan 94-87 in To-ronto Raptors lakah hnehna an lo chang ve bawk a, series-ah 2-2 chiah niin Conference Finals lut tur zawk hriat thiam a la har hle. Game 5 hi Ningani zing dar 5:30-ah an khel ang.