Michel Platini Lal thuthleng aiah hmingchhiatna zawk!

Thla leh lawkah Euro 2016 chu France-ah khelh a ni dawn a, ti hian han ngaihtuah chhin teh - inelna thlengtu France chu champion an ni a, an champion-na kawngah an player pawimawh tak chuan goal kua khungin hattrick vawi hnih a siam a, final-ah goal khungin team captain a la ni zui.

Chu player chu tun season-a league nomawi chawi hlim a ni a, Champions League nomawi chawiin Ballon d'Or a kutin hum bawk se, chu player chu an ram mipui ten an atchilhin i ring lo em ni? Ni e, chutiang chu, chutiang zawng zawng chu kum 1984 khan Michel Platini hian a lo tawng tawh a, mah se vawiinah erawh eiruk thubuai vangin football khawvel chuan he French legend hi sirah a hnawl mek si.

Nikum lawk kha chuan Pla-tini hi FIFA president ni turin khawvelin a beisei a ni a, football ngainatuten a thlen ngei an ring bawk. Mahse, a hnu lawkah French pachal hi Sepp Blatter nen thamna sum hman chungchangah thubuai siam-sak a ni a, kum riat chhung foot-ball kaihhnawih reng renga inhnam-hnawih thei lo tura hrem a ni.

Liam mai rawh le

UEFA president Platini hi a tirah tak chuan kum riat atan hrem a ni a, hrem a nihna hi ngaih-tuah nawn tura a thlen hnuah kum rukah tih tawi sak a ni.

Thamna sum atana pound maktaduai 1.3 hmanga an puh hian puh an nihna chu pawm duh loin Court of Arbitration for Sport-ah a zualko leh a, mah se khawvel infiamna thubuai ngaihtuahtu sang ber hian Platini dilna hi an pawm sak bik lo - kum ruk hrem tura tih erawh kum liah tihtawi sak a ni.

Kum li chhung hrem a nih miau avangin FIFA preisdent hial nih inbeisei hman Platini hi UEFA president aṭanga a ban a ngai dawn a, a hmangaih football a mangṭha a ṭul.

Mangṭha Platini

FIFA hruaitu thamna suma inhnamhnawih vanga hrem tawk Sepp Blatter, Jack Warner, Chuck Blazer, Jeffrey Webb leh Jerome Valcke-te ang lo takin Plaitini hian dawhkana bul ṭan loin khelmual chhung aṭangin football khawvelah a inlar hmasa phawt a, hei vang hian ngainat, zah leh ngaihsan pawh midang aiin a hlawh bik.

'Le Roi' tia hminglem an vuahsak Platini chungchang hi sawiin FIFA vice president David Gill chuan, "UEFA leh club-te ṭha takin a thawh ho tir a, pa thluak ṭha, ngaihtuahna zau tak nei, coach-te nena inhnimhnai tak a ni a, ka ngaihdan chuan UEFA president sawisel bo a ni," tiin French legend hi a fak hle.

Kum 60-a upa Platini hi hremna a tawrh zawh hunah meuh chuan kum 64-a upa a ni tawh dawn a, Juventus player ropui hi football khawvelah a rawn let tawh kher lo mai thei - mah se football khawvel chuan France tan vawi 72 a inlana goal 41 khungtu hi hruaitu ropui a nihna angin hmingchhe mah se player ropui a nihna erawh khawvelin a hriat sak reng tawh ang.