Senior player ringtawktu Del Bosque

Spain coach Vicente del Bosque chu FIFA World Cup-ah a player senior ten mualpho pui mah se thlaleha khelh tur Euro atan pawh a player tawnhriat ngah tawh ho ala rintawk thu a sawi.

2014 World Cup Brazil-a khelhah khan champion lai Spain chuan Netherlands leh Chile hneh loin knockout round pawh an inhlangkai zo lo a, hemi hnu hian David Villa, Xabi Alonso leh Xavi te chuan ram tana inkhelh an chawlhsan zui bawk.

Mahse, Bosque hian Euro qualifying-ah senior player Iker Casillas, Andres Iniesta leh Sergio Ramos te chhawr ṭangkai zuiin Group C-ah Slovakia, Ukraine, Belarus, Luxembourg leh Macedonia te khumin hmahruaitu nichungin France pan turin an inpet tling.

A squad chungchang sawiin Del Bosque chuan, "Ka veteran player-te chungah rinna ka nghat ngam a, anni ho nen hian hun kan hmanho tam tawk bakah tawnhriat an nei tam tawh. Chutihrualin naupang zawk ten min rawn pawlh a nih pawhin chona thar a ni zel ang. Mi hian Euro vawi hnih kan champion tawhna ai chuan kan hun lokal tur an ngaihven zawk a, ka hmabak
ṭha taka hlenchhuah hi kan thil tum tur pawh a ni," tiin a sawi.

Spain hian tlarhmaah tu ber nge an chhawr dawn tih a la chiang thei lo a, Diego Costa-a'n beisei angin season a hmang ṭha tawk lo, player naupang Alvaro Morata leh Paco Alcacer te bakah Fernando Torres leh Aritz Aduriz te chu koh tura rin zinga mi an ni.

Chelsea striker Costa chung-chang sawiin, "Diego khelh dan leh nungchang hi ngaihdan hrang hranga a awm thei ang. Kan zinga a awm chuan nungchang mawi lo a lantir ngai lo," tiin a striker nungchang mawi lo tia an sawisel ṭhin chu a chhan.