Arbeloa ang khan an thlah tur a ni - Casillas

Real Madrid keeper hlui Iker Casillas chuan a club hluiin season tawp ruala chhuak tur Alvaro Arbeloa an thlah dan chu ṭha a tih thu a sawi.

Spanish keeper Ca-sillas chuan, "Real Madrid tana khel tawh zawng zawngin supporter leh teammate-te nena hun hnuhnung hman kha an phu a ni. Alvaro hi club youth system chhuak ni mah se club theihna a nei tih lantir turin club dangah a intuai hriam a ngai a, Real tana a khelh hnuah a thawh hlawk a, a kal zelna turah duhsakna ka hlan," tiin Spanish right back an chawimawi dan chungchang a sawi.

Kum 34-a upa Casillas hian Real Madrid-ah a hun tam zawk a hmang a, kum 25 chhung Spanish club lian tana a khelh hnuah season ṭantirh khan Portuguese club FC Porto a zawm. Casillas hi Spanish club tana a hun hnuhnung lamah supporter-te bakah club hotute nen an inkar a khi a, keeper ropui hian a phu tawk ang chawimawina a hmu lo.

Pathianni khan Real Madrid-in Valencia an hneh a, he inkhel hi kum 33-a upa Alvaro Arbeloa-a'n Real kawr nena Santiago Bernabeu nena a inlan hnuhnung ber a ni. Zinedine Zidane-a hote hian La Liga match hnuhnung berah Deportivo la Coruna chu Estadio Riazor-ah an hmachhawn ang.