Rome lamah Djokovic leh Serena

Tennis clay court tournament khelh mek a ni a, tunkar chhung hian Rome Open khelh tur niin ATP world number 1 Novak Djokovic leh WTA number 1 Serena Williams te chuan French Open inbuatsaih nana hman an tum thu an sawi.

Kum 28-a upa Djokovic hi hard leh grass court-ah te chuan hlawhtling viau mah se beisei angin clay-ah a la hlawhtling tawk lo. Monte Carlo-ah pawh Jiri Vesely hneh loin a tla nghal. Mahse, kar hmasa khan Madrid Open-ah inlan zuiin Andy Murray hnehin ATP 1000 Masters title 29-na a la leh tawh.

Kumina inelna pangaa champion tawh Djokovic chuan, "Kum tir ka hman dan chu duhthusam ang thlap ni lo mah se ka lawm a, ka khelh danah ka lungawi. Inkhel reng thei ka ni lo a, ka taksa a chauh lutuk loh nan chawlh pawh ka mamawh ve ṭhin. Madrid Open khelh hmaa chawlh ka nei kha ka ṭhatpui a ni, hei hian Rome leh French Open atan inrintawkna min siamsak ngei ka beisei," tiin a la champion ngai lohna hmunah hlawhtlin theih tawh a inring.

Hetihlai hian Dojokovic hna hi a awlsam dawn lo a, world number 2 ni thar Roger Federer chu a khup na a dam tawh. Tun hnai kum 11 chhunga vawi sarih champion thei Rafael Nadal a inlan dawn bawk. Hetihlai hian Jo-Wilfried Tsonga erawh malpui na vangin a inhnukdawk thung.

Hmeichhe lamah rinkai an awm thei tawh lo a, Madrid Open-ah khan Serena chu damlohna vangin hun tepter tawh takah a inhnukdawk a, seeded chang pha zingah Simona Halep chu quarter final inhlangkai thei awmchhun niin a champion zui.

Seeded pakhatna tur Serena chuan, "Tun hnaiah ka hriselna dinhmun a ṭha chho ve tawh hle a, a hma aiin ka ṭha tawh zawk. Inkhel turin ka inpeih e," tiin a khingpui turte lakah a inhrosa leh tawh.

Karhmasa a hnungzâng na vanga enkawl ngai Agnieszka Radwanska chu a la inkhel thei lo ang a, Australian Open champion Angelique Kerber chu seeded pahnihna a ni ang.