Mizo Champion 0 - 0 Goan Champion

Aizawl FC captain David Lalrinmuana ball pet ṭha zet chu goal ngei tura ngaih ni mah se Sporting Club de Goa keeper Arin-dam Bhattacharya-a'n a dang a, Mizo champion
leh Goan champion goal awm loin an inhnehtawk.

Nimin tlai khan Rajiv Gandhi Stadium, Mualpuiah Aizawl FC leh Sporting Goa ten Federation Cup semifinal first leg an khel a, Mizo mipuiin Mizo club an ṭawiawm ṭha hle. Fatorda Stadium, Goa-ah May 15, Pathianni khian second leg an khel ang a, final hi Guwahati-ah May 21, Inrin-niah khelh a ni ang.

Ni sa hnuaiah

Inkhelh ṭan hun hi tlai lam dar thum ni mah se ni a la sat avangin inkhelh a harsa hle. Aizawl FC tana goal khung harsatna belhchhah turin Mateus Costa-a'n a naute goal veng-him turin a hrilh uluk tih a chiang a, MPL cham-pion-in first half-ah goal zawnah an pet lo.

Sporting Goa-in ṭan phata Nicholas Fernandes hmanga an chance ṭha neih an chhunzawm thei lo a, Syrian midfielder Mahmoud Al Amna chu Mizoram a vawi khat rawn tlawhnaah a langsar a, Aizawl FC keeper Soram Porei tan erawh hna a siamsak thei lo.

A goal lo

First half a hmuhnawm lo a, second half erawh a dang nghal. Sporting Goa an hlauhawm nghal a, Aizawl FC-in vaw letin hero of the match-a thlan Alfred Kemah Jaryan-a'n hla tak aṭangin keeper pet khum a tum a, goal zawnah a kal lo.

Liberian forward freekick hlawhchhuah chu David-a'n petin changtu nei lo Emma Chigozie-a'n goal zawnah a tauh thei lo. Aizawl FC winger pahnih Lalramzauva leh H. Lalmuankima ten hna an thawk ṭha tawk lo a, Albert Zohmingmawia leh Lalbiakhlua te luh hnuah inkhel a nung sawt.

Minute 10 chiah a awm tihin captain David chuan Sporting Goa substitute Denson Devadas chiang taka a bum hnuah goal kil takah a pet a, Goa keeper Arindam-a'n ropui takin a dang. Hun tawp lamah Biaktea leh Lalramchullova te inthlawp fuh tawk loh vangin Sporting Goa-in an nawr let a, Nicholas-a ball fing tak chu substitute Victorino-a'n goal-ah a chantir thei bik lo.

Injury time-ah captain David-a'n freekick hmang-a goal khungna hun remchang a nei a, amah-erawhchu Bengaluru lama goal mawi khungtu midfielder hian Sporting Goa wall siam a pet khum lo a, hun a tawp zui bawk.

Dinhmun ṭha

Sporting Goa manager Mateus Costa chuan, "Goa-ah kan khel tawh dawn a, Densil Theobald kan chhawr thei tawh dawn. Away goal nei lo mah ila final lut turin Aizawl FC aiin kan dinhmun a ṭha zawk," tiin final thlen ngei a inrinthu a sawi.

Goan coach thusawiah Bengali coach a zam lo. Aizawl FC coach Jahar Das chuan, "Coach chuan mahni club ṭhatna tur ṭheuhin thu an sawi vek. Keini hian Goa-ah goal khung ila, in draw pawh ni ila final kan lut ang. Aizawl FC dinhmun a ṭha zawk, kan zin chhuah hunah chuan goal khung tumin inkhel bul aṭangin kan khel ang," tiin inkhelh banah a sawi.