Bayern player thar Hummels

German champion Bayern Munich chuan league nomawi an chawi hnu lawkah thawm an nei lehnghal a, Bundesliga-a an elpui ber Borussia Dortmund captain Mats Hummels an lakluh bakah Benfica midfielder Renato Sanches an la lut bawk.

Kum 27-a upa Hummels hian Bayern Munich-ah hian kum nga cham turin contract a ziak a, medical a la paltlang leh a ngai dawn. Kar hmasa lawka Dortmund chhuahsan a duh thu tichiang tawh defender man zat hi puan zar a ni lo.

Bayern-a a career bul ṭantu Hum-mels hian kum 2007 khan loan-in Dortmund a zawm a, kum 2009 khan a nghetin Signal Iduna Park-ah lutin amah siam liantu club chhuahsanin Allianz Arena lam pan leh a thlang ta zawk.

May 21-ah Dortmund leh Bayern Munich hi German Cup final-ah an inhmachhawn dawn a, Mat Hummels hi khelmual chhungah a inlan a nih chuan hei hi Thomas Tuchel-a team tana a match hnu-hnung ber tur a ni ang.

Bayern chief executive Karl-Heinz Rummenigge chuan, "Mats hi khawvela central defender ṭha ber pawl a ni a, kan hnena a rawn kal dawn avangin kan team quality chu a san phah sawt dawn a ni," tiin a phur hle.

Hetihlai hian Manchester United pawhin lakluh tuma an dawr Portugal international Sanches-a man zatah Bayern chuan pound maktaduai 27.5 an seng a, Allianz Arena-ah hian kum nga hun a hmang dawn a ni.

Rummenigge chuan kum 18-a upa Sanches an lakluh chungchang hi sawiin, "Renato hi player tharum ngah, ball thiam leh huaisen a ni a, kan team ti chak tura player pawimawh a ni," tiin a fak bawk.