Real an chak leh ang - Gento

Real Madrid-in kum hnih liam ta khan Champions League-a vawi 10 (La De-cima) an champion-na ni turin an hmelma Atletico Madrid chu extra time-ah 4-1 in an hneh a, kumin hian Madrid club pahnih ten final an luh leh bawk.

Real legend Francisco Gento chuan, "Portugal-a kan lo tih tawh angin Atletico hi kan hneh nawn leh ang. Team ṭha tak kan nei a, player ropui kan nei a, kan hlawmchham thiang lo," tiin Spain chanchinbu lian Marca a hrilh.

Kum 82-a upa Gento chuan sawi zelin, "Nomawi chawi tur chuan minute 90 chhung rim taka thawh a ṭul. Real hian draw kan tum ngai lo a, chak tum chauha kan khelh ṭhin avangin nomawi tam tak kan chawi a ni," a ti.

Gento hian kum 1953 leh 1971 inkar khan Real Madrid tan a khel a, hemi chhung hian La Liga title 12, Copa del Rey title pahnih leh European Cup (Champions League) nomawi paruk a la bawk. Spanish player ropui hi a inkhelh hun laia a khelhna postion chu outside-left a ni a, tun lai chu ni se a khelhna hmun hi forward emaw winger emaw tiin an sawi ang.