Chelsea-a cham inbeisei Terry

June thlaa Stamford Bridge-a a contract neih lai hmang zo tawh tur Chelsea captain John Terry chuan Blues-ah ngei a hun hman zawh a duh thu a sawi.

Kum 1998-a Chelsea tana a match hmasa ber kheltu defender hi Blues lamin contract thar an zawrh loh avangin season tawp ruala chhuak tur anga sawi a ni a, amah ngei pawhin lunghnur tak chunga a club hmangaih hi a chhuahsan mai a ngaih a rin thu a lo sawi tawh.

Karhmasa Inrinnia Sunderland an hneh loh ṭumin John Terry hi yellow card pahnih a hmuh avangin hnawhchhuah a ni a, match hnih hrem a nih avangin tun season-a match hnih chiah khelh hmabak tawh Chelsea tan tun season-ah a inlan tawh dawn lo a - a damchhunga a inlan tawpna ber a ni thei bawk.

Kum 35-a upa defender chuan, "Kum engemaw zat chhung chu inkhelh ka la duh a, he hun hi Chelsea-ah ngei ka hman ka beisei. Chelsea player ka ni a, kum 14 ka nih aṭangin he club tan hian ka khel tawh," tiin contract thar zawrh duh lotu club-ah cham zel a la duh.

England captain hlui hian Chelsea tan match 703 khelin Premier League (4), FA Cup (5), League Cup (3), Champions League (1) leh Europa League (1) nomawi a chawi tawh.

Chelsea hian zanin dar 12:30-ah Liverpool an lenchilh dawn a, captain John Terry tel loin Europa League final khel tur club hi an hmachhawn ang.