Euro beiseitu Wilshere

Arsenal midfielder Jack Wilshere chuan Euro khel tura koh zinga tel ngei a inbeisei a, a theihna lantir turin Premier League chu la tawp rih mai lo se a duh thu a sawi hial!

England international hi hliam vangin tun season-ah a la inkhel mang lo a, season tawp lamah rawn dam ve chauhin kartawpa Man-chester City nen 2-2 a an in-hnehtawk ṭum pawh khan Danny Welbeck thlakin bench
aṭangin a rawn tlan lut.

Arsenal hian Pathianni zan hian tun season Pre-mier League-a an match hnuhnung ber chu Emirates Stadium-ah Aston Villa nen an khel dawn a, England manager Roy Hodgson lungtiawi turin Wilshere hian a theihna pholanna tur hun
ṭha a nei tam tawh lo hle.

Kum 24-a upa Wilshere chuan, "Ka dam tawh a, boruak sang tak leh inkhel hautak hmachhawn tur pawhin ka inpeih tawh. Ka tan season a inṭan ve dawn chauh avangin league hi la tawp mai lo se ka duh hial, ka theihna pholang turin khelmualah hun tam zawk hman ka la mamawh a ni," tiin a sawi.

Euro 2016 khel turin England hian qualifying-ah hneh loh nei loin an inpet tling a, Group B-ah Russia, Wales leh Slovakia te nen an awm hoin an match hmasa ber atan June 11 khian Russia nen an inkhel ang.