Medal dawng lo Joey Barton

Thawhṭanni khan Burnley Town Hall-ah Burnley-in Foot-ball League Championship-ah nomawi an chawi a, player pawimawh midfielder Joey Barton bakah defender James Tarkowski te'n medal an chang lo.

Clarets hian league match hnuhnung berah Charlton Athle-tic chu 3-0 a hnehin Cham-pionship-ah an champion. Amaherawhchu Football League hotuten khualmualah nomawi chawi an phal loh avangin Burnley hian an supporter-te nen Inrinni zan khan The Valley-ah an hlawhtlinna an lawm thei lo a, Thawhṭanniah Town Hall-ah nomawi an chawi chauh.

Football League hotuten Burnley hnehah player 25 tan medal an buatsaih thu hrilh mah se champion thar hian lawmman dawng turin player 27 an ko a, Barton leh Tarkowski te an vanduai phah ta a ni.

England tana vawi khat khel tawh Barton chuan, "Medal ka dawng lo? eng nge a awmzia?" tiin twitter-ah a ziak a, club lam pawhin player-te leh Football League chungah ngaihdam an dil bawk.

Manchester City leh New^-castle midfielder hlui hian an champion-na kawngah match 38 zet khelin goal thum a khung a, club player of the year atana an thlan bawk avangin a lungawi lo hi a awm hle. Nungchang mawi lo vanga lar Barton hian Championship nomawi pawh chawi duh loin a lungawi lo tih lantir nan ham puarchawp chi nomawi lem chu langsar takin a chawi thung.

Burnley media manager Darren Bentley chuan, "Football League dem tur a ni lo a, ka thiam loh a ni. Joey Barton chungah ngaihdam ka dil a, hun hreawm tak ka tawntir avangin ka inthiam lo hle a ni," tiin a thiam loh a nih thu a sawi.

Kum 33-a upa Barton chuan twitter kaltlangin thil thlen dan chu a hriatthiam thu a sawi leh tho a, English midfielder ngeiawm tak hian an hnuaia awm Middlesbrough-in Premier League an tlin avanga champion ang maia an lawm chu a deu sawh tel hram bawk.