Player-te mawhphurhna a ni - Sagna

Season tharah Man-chester City-in Champions League an khel phak lo a nih chuan player-te chu dem tur an nih thu defender Bacary Sagna chuan a sawi.

Man City hian an league match hnuhnung paliah vawi khat chiah hnehna an chang a, kartawp khan Arsenal nen inhnehtawkin league table-ah palina dinhmun la luah mah se Manchester United inkhel result-ah an innghah a ṭul tawh.

City hian point 65 hmuin Man United nen an inthlauhna chu point hnih chiah a ni a, nizan khan United hian West Ham lakah point thum an hmu a nih chuan City hi palinaah an tla thla dawn tihna a ni a, inkhelh hmabak pakhat ve ve an la nei ang.

Manuel Pellegrini naute hian season
ṭan tirh khan an league match hmasa pangaah hnehna chang zawnin champion tura rinkai an ni hman a, tunah erawh an dinhmun hi duhawm tawh rih lo hle a ni.

Kum 33-a upa Sagna chuan, "Arsenal nen kan inhmachhawn ṭum kha chuan team ṭha ber ang maiin kan khel a, khatiang khan season tluanin khel thei ila a duhawm hle. Famkim lohna lai nei mah ila a ṭha ber hlenchhuak tur chuan kan kutah a innghat. Kan hnathawh leh thawhrimnate ngaihtuah chuan Champions League khelh chhunzawm hi kan phu," tiin a sang pali zinga tel a inbeisei hle.

Man City hian an club chanchina a vawi khat nan Champions League semifinal an lut a, mahse Real Madrid lakah 1-0 a chak loin an duhthusam a hlawhtling zo ta lo a ni.