Leicester City Ranieri-a tan contract thar; Mahrez a vul zual zel

Khawvel mak tih tura Premier League champion ni ta Leicester City-in league no-mawi an chawi hnuah thawm an neih belh zel a, an manager Claudio Ranieri chu King Power Stadium-ah rei zawk cham tura contract thar ziahpui an tum.

Leicester City hian season hman meka an club awards semna an nei bawk a, PFA Player of the Year chawimawina lo dawng tawhtu Riyad Mahrez chu Player of the season-ah thlan niin N’Golo Kante chu Players’ Player of the Season lawmman nen a haw bawk.

Contract thar

Italian manager Claudio Ranieri-a'n season ṭan dawna relegation sual tura ngaih club kha Premier League nomawi a chawipui a, Leicester City-in nikuma an lakluh an manager contract thar zawrh an tum nghal chung hi thil mak a ni lo.

Foxes vice-chairman Aiya-watt Srivaddhanaprabha chuan kum 2018-a a contract tawp tur manager chu an hnena cham tura chelh an duh thu sawiin thuchiang erawh engmah a la sawi lo thung.

Srivaddhanaprabha chuan, "Season tawp rualin contract thar chungchang hi kan sawi pui ang. Keini chuan kan hnenah hun rei zawk cham se kan duh a, kan hnena nuam ti taka hnathawkte chu kan hnena cham zel turin kan duh ṭhin a ni," tiin an manager chungchang a sawi.

Ranieri hian Foxes-ah a hun tawp hman a duh thu sawi ṭhin mah se Italian Football Federation president Carlo Tavecchio chuan Italian manager of the year-a Foxes boss an thlan ṭum hian a hnampui pa chu an ram team enkawla World Cup nomawi chawipui tura a duh thu a lo sawi tawh a, Ranieri hi Italy nen pawh sawizawm mek an ni.

Mahrez a ropui

Algerian winger Mahrez-a'n season duhawm tak a hman chuan khelmual pawn dawhsan lamah pawh hriatsak a hlawh zel a, Leicester City fan-ten an player chhuanvawr hi Player of the season-ah an thlang.

Tun hnaia a agent-in King Power Stadium-a chhuahsan theihna chu 50/50 a nih thu a sawi Mahrez chuan, "Fan-ten player ṭha bera min ngaih avangin ka lawm a, a nuam a ni. Min ṭawiawmtu ṭha tak an nih avangin Leicester fan-te chungah ka lawm a, an vaiin ka hmangaih em em vek a ni. Tun season-ah hian anni puihna zarah thil ropui leh awihawm loh kan thlen tir," tiin a hlim hle.

Mahrez hian he chawi-mawina dawng tur hian Premier League-a goal 24 khungtu Jamie Vardy leh midfielder
ṭangkai N’Golo Kante-te a khum a ni.

Kante thawhrim rah

Tun season Premier Lea-gue-a player taima leh tlan tam thlan ni dawn se N’Golo Kante aia hetiang dinhmun luah phu hi an awm kher lo ang. French midfielder hi a thawhrimna leh thiamna avangin France squad-a koh a ni tawh a, Leicester-a a khelhpui player-ten Kante thawhrimna an hmuhmaih bik lo - Players’ Player of the Season-ah an thlang.

Arsenal nena sawizawm hlawh mek Kante hian he chawimawina dawng tur hian Mahrez, Vardy leh captain Wes Morgan-te aia thiam tih a teammate zingah a hlawh zawk.

English striker Jamie Vardy-a'n chawimawina pahnihah a ṭhiante phak lo mah se kut ruak tawpin a haw bik lo a, Liverpool 2-0 a an hneh ṭuma a goal ropui chu 'goal of the season'-ah thlan a ni.

Leicester academy graduate Jeffrey Schlupp chu Young Player of the Season-ah thlan a ni a, Claudio Ranieri leh a naute chuan khualmuala 3-1 a Manchester City an hneh chu Performance of the Season-ah an thlang bawk.

Foxes-ah striker thar?

Season tawp a hnai a, transfer bazar inhawn hnaih tawh lamah Leicester City an awm mai mai bik lo. Manager Ranieri-a'n player ropui ai chuan team-in an ṭhatpui theih tur player an zawn tur thu a sawi a, thawm an neihna hmasa ber chu Serie B club Pescara striker Gianluca Lapadula a ni.

Ranieri chuan Serie B match 38-a goal 24 khungtu striker hi an rim thu pha loin, "Italy-ah player kan zawng mek tih hi phat thu a awm lo. Lapadula hi player ṭha tak a ni a, hun rei tak chhung chu kan thlithlai tawh a ni," a ti.

Pescara president Daniele Sebastiani pawhin Foxes-in an striker hi an duh thu sawiin, "Leicester-in Premier League nomawi an chawi hma daih tawh khan Ranieri hian min rawn be tawh a, kan striker hian a mit a lak thu min hrilh. Official taka thil kalpui erawh a la ni lo," tiin a sawi ve bawk.