Dinamo-in Patrick Ekeng a hre reng

Kar hmasa Zirtawpnia inkhelh laia lung ṭha lo vanga a tluk hnua thi zui ta midfielder Patrick Ekeng hriat reng nan a khelhna club Dinamo Bucharest chuan Romanian Cup-ah an champion a nih chuan Cameroon-ah an champion nomawi an thawn dawn.

Kum 26-a upa Ekeng hi Romania league-a Dinamo leh Viitorul inkhelh laiin minute 70-naah a tlu a, damdawi-in panpui a nih aṭanga darkar hnih hnuah a thih thu puan a ni.

Ekeng-a khelhna Dinamo hian Romanian Cup-ah final lut tawhin vawi 13 champion tawh club hian CFR Cluj chu May 17 khian nomawi inchuhin an inkhelhpui ang.

Dinamo sporting director Ionel Danciulescu chuan, "Romanian Cup-ah hian kan champion thei a nih chuan nomawi hi Cameroon-ah kan thawn ang a, Patrick-a thlanah kan dah dawn a ni. Kan champion zo ta lo a nih pawn kan thil tum ang hi min tih hlawhtlinsak turin Cluj kan ngen ang," tiin an player thi ta zahna an lantir tur thu a sawi.

Hetihlai hian football khawvelin chanchin lawmawm lo a neih chhun-zawm a, Patrick Ekeng thih aṭanga ni hnih hnuah Cameroon hmeichhe club Femina Stars Ebolowa goalkeeper Jeanine Christelle Djomnang chu warm-up neih laiin lung ṭha lo vangin a thi bawk.