NBA MVP Stephen Curry

Basketball ngainatute ngaihsan, player-te nih châk leh miputen an ngaihhlut National Basketball Association Most Valuable Player chawimawina chu Golden State Warriors point guard Stephen Curry kutah hlan a ni leh ta.

Oakland, California-ah Golden State Warriors superstar Curry hian a zawna a kum hnih nan MVP chawimawina hi a dawng a, NBA chanchinah Curry hi he chawimawina a zawna dawng thei 11-na ni mah se ani chiah hi vote thlaktu 131 ten inlungrual taka pakhatna dinhmun luah tura an tlanchhuah hmasak ber a ni. Warriors guard hian Shaquille O'Neal (120) leh LeBron James (121) te hnehsawh taka thlan tlin an lo nih tawhna chu a rawn khum chiang hle a ni.

A phu e...

Kum 28-a upa Curry hian Warriors chu regular season ṭha tak a hman pui a, match 82 an khelh aṭanga vawi 73 hnehna chan puiin NBA regular season khat chhunga hnehna chang tam thei ber record an siam hial! 1995-96 season-a Chicago Bulls-in match 72 hnehna changa vawi 10 chak lo record an siam tawh chu an khum. Warrior-in season duhawm tak an hman theih nana kaihruaitu Steve Kerr chu Coach of the Year atan thlan a ni bawk.

Tun season-ah Warriors hian 3-points ringawt pawh vawi 1,077 ngawt an nei thei a, NBA chanchinah season khat chhunga 3-point vawi 1,000 nei tling thei hmasa ber an ni bawk. Curry hian tun season-a a game tinah point 30.1 score ziah ang a nih bakah assists vawi 6.7 leh rebounds 5.4 la ziah ang a ni a, tun hma lamain season khat chhunga 3-points vawi 300 nei thei an la awm loh laiin Curry hi chuan vawi 402 zet a nei hem mai a ni.

Golden State Warriors tana player pawimawh ber Curry hian nikum October leh November bakah kumin February te khan Western Conference Player of the Month chawimawina a lo dawng tawh bawk a, season khat chhunga he chawimawina ṭum thum dawng thei hmasa ber a ni bawk. He mai hi a lo ni lo, Western Conference Player of the Week atan
ṭum li thlan a ni cheu.

NBA chanchin an sawi apianga an sawi hmaih ngai loh MVP chawimawina vawi nga ngawt lo dawng tawhtu Michael Jordan bakah Los Angeles Lakers guard Magic Johnson leh Cleveland Cavaliers forward LeBron James te rualin Curry hming hi an lam ri kumkhua ve tawh ang.

Eng nge an sawi?

2004-05 leh 2005-06 a Steve Nash-a'n MVP a dawn zawn hnua guard zinga hetiang dinhmun luah leh thei hmasa ber Curry chuan, "Inkhel hmelhmang tih danglam tumna ka nei ngai lo a, ka inkhelh chhungin chutiang chu a thleng ngai lo ang. Basketball ngainatu ten he game hi an hlut a, ṭhangthar lo awm leh zeltur cho chhuak tu leh ti phur thei tu nih hi ka duh dan leh tum dan zawk chu a ni. Chumi ti hlawhtling tur chuan nitina hmasawn hret hret zel a ngi a, thawhrimna hi a pawimawh lai chu a ni," tiin basketball khel zel turte tana entawn tlak nih a duh thu a sawi.

Warriors coach Kerr chuan, "Vote thlaktu zawng zawngin Curry an dah sang ber vek kha chu awih a har zawk hial. Tunah chuan khawvela infiammi langsar berte zinga mi a ni tawh a, a ṭhatlai hmang mektu ni mah se hmasawn duhna thinlung a neih avangin a tha a thlah ngai lo," tiin a player chungchang a sawi.