West Ham-in hrem na dawn

West Ham chuan Upton Park-a an match hnuhnung ber khelh hmaa Manchester United team bus vawmtute chu damchhunga inkhel en thei lo turin an hrem dawn.

Hammers supporter-te buaina siam vang hian inkhelh ṭan hun chu minute 45 laia sawn tlai a ni a, United hi London traffic jam-a an tan vangin Tottenham Hotspurs nen an inkhelh ṭumin ṭan hun sawn tlai a ni tawh bawk.

Football Association chuan West Ham suppor-ter-te chet dan an dem rualin an zirchian tur thu an sawi nghal a, Manchester United captain Wayne Rooney chuan, "Kan chuanna bus-in beih a tawk a, West Ham club lam pawh an supporter-te chet danah an lungawi lo khawp ang," tiin a sawi.

West Ham chuan, "Zan duhawm bik a ni a, hun hlimawm tam tak kan tawng a, kan supporter-te an ropui bawk. Kan supporter zinga 99% te mawi takin an che a, club tan an hlu a ni. Chutihrualin Boleyn Ground pawnah supporter-te zingah Manchester United team bus ti chhia an awm. An chetdan hi kan pal zam dawn lo a, police lamin tute nge an nih tih an hriatchian hunah damchhunga inkhel en thei lo turin kan hrem ang," tiin thuchhuah an siam.

Hetihlai hian West Ham co-chairman David Sullivan chuan United chu stadium chheh velah mipui an tam dawn tih hre reng chunga an thlen hma tawk loh vangin a dem thung.