Celtic manager thar tur Roy Keane?
Scottish Premiership-ah season nga chhung a zawna an champion-na ni turin Celtic-in nomawi an chawi zo chiah a, nomawi an chawi hmain manager Ronny Deila-a'n a ban tur thu a lo sawi lawk tawh avangin Scottish club manager thar tur hi an inrinsiak nghal luai luai.
Manager tawnhriat ngah leh langsar tak tak kara hming langsar ber erawh manager a nihna ang aia khelmual chhunga tawnhriat ngah zawk Roy Keane a ni a, pawisa inthapna firm pakhat chuan Manchester United captain hlui hi Celtic coach a nih dawn leh dawn loh chungchanga inthapna chu a titawp tawh hial - Roy Keane-a'n Celtic a enkawl ngei a rinawm tihna a ni.
Keane ringtu Celtic keeper
Roy Keane leh Celtic sawizawm an nih ruala player phur ber pawl chu Celtic goalkeeper Craig Gordon a ni. Kum 2007-a Keane-a'n Sunderland a enkawl laia Hearts aṭanga pound maktaduai 9-a a lei keeper chuan, "Pa rothap leh dikna ngaina mi a ni a, Celtic enkawl tura rawih a nih phawt chuan a hlawhtling ang tih ka ring tlat a ni," tiin a manager hlui chungchang a sawi.
Kum 33-a upa manager chuan sawi chhunzawmin, "Sunderland-a kan awm dun lai khan a duhdan chu chiang takin ka hre hman a ni. Player rorum leh huaisen taka thutlukna siam ṭhin, match tina chak duh a ni a, manager a nih hnuah pawh he a nihna hi a thlah lo," tiin Republic of Ireland assistant manager nilai Keane chua fak hle.
Keane hian Celtic a pan a nih pawhin a mikhual lo ang. Scottish club tan hian kum 2005-06 season kha a lo khel tawh a, Scottish Premier League leh Scottish League Cup nomawi chawipuiin football a chawlhsan.
Gordon chuan an club chu enkawl chakawm tak a nih thu sawi nghalin, "Manager
ṭha tak tak nena kan club sawi zawm a ni hi a mak lo. Club lian tak, Europe-a inlan tur kan ni a, hetiang ti thei club hi Britain-ah an tam lo," tiin an club chungchang a sawi.
Keane-a sulhnu
Kum 44-a upa Keane hian player a nihna laiin chawi-mawina dawng kim thawkhat viau mah se coaching lam a luhchilh hnuah erawh a ropui tawk lo.
Manchester United tan a khelh laia Premier League (7), FA Cup (4) leh Champions League (1) nomawi chawitu hian inkhelh a chawlhsan hnuah coaching lam a luhchilh nghal a, a club enkawl hmasak ber chu Sunderland a ni.
Keane hian a season hmasa berah club talbuai Sunderland-ah hartharna thlenin hetih hunlaia Championship club hi Premier League-ah a inhlan-kaipui a, 'Championship Manager of the Year'-ah thlan a ni hial.
Premier League-ah erawh Keane-a'n a beisei ang result a hmu hleithei lo a, table-ah 18-na dinhmun an luah laiin Decmber, 2008-ah Black Cats hi a chhuahsan a, a rorum leh rothap em avanga player ngainat hlawh lo nia an sawi manager hi a bang tih an hriatin Sunderland player-te chu an lawm niin an sawi!
Keane-a'n Sunderland a chhuahsan hnuah Ipswich Town enkawl mah se an beisei ang result a neihpui theih loh avangin ban a ni leh a, kum 2014 khan Aston Villa assistant manager dinhmun luahin tunah hian an ram Ireland assistant manager ni lai mek a ni.