Adam-a ropuina Pune tan a tawk lo

Thawhlehni zan Indian Premier League inkhelah Pune Supergiants tana spin bowler Adam Zampa che ṭha mah se a team a chakpui zo lo a, Sunrisers Hyderabad lakah run liin an tlawm.

Batsman aia bowler ho an lan-sarh zawkna inkhelah hian Hyderabad an bat hmasa zawk a, over 20 chhunga run 137 siamin mi pariat an hloh. Sunrisers tana run siam hnem ber Shikhar Dhawan chuan run 33 a tlin hram.

Supergiants tan spin bowler Adam Zampa a langsar fal nalh a, Australia tana ODI match hnih chiah la khel bowler hian over li a vawmah run 19 chiah pein wicket ruk a la thei!

Rising Pune bat hun a thleng a, run siam loa opener Ajinkya Rahane a out hnuah an che ṭha zui bik lo. Rising Pune hian over 20 chhungin run 133 siama mi pariat hlohin an target chu run li a phak loin a tlawm zawkah an ṭang ta a ni.

Hyderabad tan Ashish Nehra chuan a la tar lo tih khelmual chhungah lantir zelin wicket thum a la a, kum 37-a upa bowler hian over li a vawmah run 29 chiah a pe bawk.

Zanin Indian Premier League-ah match khat chiah a awm dawn a, zan dar 8:00 hian Sunrisers Hyderabad chuan Delhi Daredevils an hmachhawn ang.