Hunthar-in 3rd MAP hnehin hma an hruai

Thawhlehni zan khan Zothan Auto Works Pro-Volleyball League chu Dengṭhuama Indoor Stadium Mualpuiah khelh chhunzawm leh a ni a, Hunthar VC chuan 3rd MAP lakah 3-2 a hnehna changin league table hmahruaitu an ni ta. Zanin dar 8:00 hian a hmun ngaiah inkhel pakhat a awm leh dawn a, Anastasia VC leh Hmingi VC te an inhmachhawn ang.

Hunthar an ṭha

Hunthar hian an match hmasa zawkah TNT chu 3-0 in an lo sawp tawh a, 3rd MAP lakah 23-25, 25-15, 25-23, 23-25, 15-12 a hnehna an chan leh tak avang hian a zawnin MVA first division club-a an awmpui pahnih an hneh. Match hnih an khelh tawh aṭanga point nga hmuin hmahruaitu an ni a, an hnuai chiahah hian point li hmutu 3rd Bn MAP an awm ve bawk.

3rd Bn MAP leh Hunthar hi team ṭha niin champion tura rinkai zinga mi an ni a, Thawhlehni zan an inkhelah pawh hian set tinah an inbei tawk em em vek. Team paruk an inkhelh kual hnuah a sang pahnihin final an khelh dawn avangin anni pahnih hi an intawng leh lo ang tih a sawi theih loh.

Hmingi VC tan fiahna

Mizoram Volleyball Asso-ciation hnuaia team hlauhawm ber pawl ni mek Anastasia VC hian tun season-a MVA second division inelna zawng zawngah an mahni khing phak an tawh lo a, Pro-Volleyball League-a an match hmasa berah pawh Chanmari West an hneh thei. Hetihlai hian zanina an khingpui tur Hmingi VC erawh beisei angin an la khel ṭha tawk lo a, an match hmasa zawkah 3rd Bn MAP an hneh loh avangin final lut tur chuan chetsual a thiang tawh lo thung.