Upton Park thlah nan United an vel

West Ham United-in UEFA Champions League khel tura chak mamawh Manchester United hnehin kum 112 chhung an inkulhna Upton Park an thlah. Hammers hi season thar aṭangin Olympic Stadium, Stratford-ah an insawn ang.

United bus-in beih a tawk a, inkhelh hun minute 45 in sawn tlai a ni. Thawhlehni zan inkhelah hian United-in Diafra Sakho hmanga West Ham hmahruaina chu Antony Martial goal hnih hmangin lehthal mah se Hammers-in Michail Antonio leh Winston Reid te goal hmangin an chhang let a, 3-2 in hnehna an chang.

UCL-ah Gunners

Louis van Gaal-a hote Upton Park-a an hlawhchham takah chuan season tharah Arsenal-in Champions League an khel dawn, United tan Gunners hi umphak theih a ni tawh lo.

Champion Leicester City, Tottenham Hotspurs leh Arsenal te hnung zui turin Manchester City dinhmun a ṭha a, Manuel Pellegrini hoten match hnuhnung bera Swansea laka point an hmuh chuan Pep Guardiola-a'n season tharah Champions League team a enkawl ang.

Manchester United tan erawh Europe inelna sang bera khelh a beiseiawm tawh lo a, match hnuhnung bera AFC Bournemouth an hneh lo a nih phei chuan Europa League khel turin FA Cup champion ngei ngei a ṭul ang.

Goal nga lawih

Hammers-in kartawpah Swansea 4-1 in an hneh lo a, United erawh Norwich hneh zo hlim an ni. Louis van Gaal-a hoten an kutah an hmalam hun a awm tih hre mah se FA Cup semifinal-a an hneh tawh West Ham-in inkhel bul an ṭan ṭha zawk.

Slaven Bilic-a'n a naute a fuih ṭha tih a chiang a, minute 10-na lekah Diafra Sakho-a'n goal khung nghalin first half pum inkhel an thunun a, goal tam zawk an khung theih loh avangin khel ṭha lo United-in beisei an nei ve zel.

United innghahna Antony Martial-a'n inkhel kalhmang tidanglamin minute 51-naah an siphurh a sut a, French forward hian minute 18 khelh tur a la awm tihin hmahruaina goal a khung leh bawk.

Hammers-in hun tawp lamah an pa lenna leh Dimitri Payet ball thiamna an hmang ṭangkai a, Michail Antonio (76') leh Winston Reid (80') ten hammer of the year ball pet tauh lut ve vein West Ham chu an mualah 3-2 in an chak.

Hmathlir thar

Manchester United midfiel-der hlui Paul Scholes chuan, "United team-ah hian talent ṭha tak tak nei an awm a, chutichung chuan an khel hmuhnawm tawk lo a ni. Team-in inthlak hlawk a mamawh lem lo - centre defender leh striker an mamawhin ka hria a, midfielder fing deuh a ṭul bawk. United tan palina nih tum tur a ni lo, tuna pawisa hman dan thlir phei chuan champion theihna zawng zawngah nomawi chawi an tum tur a ni," tiin a club hlui khelh dan a duh khawp loh thu a sawi.

United-in hrem vanga khel thei lo Marouane Fellaini awm loh an tuar tih a lang a, chutihrualin Belgian midfielder hi player hmuhnawm erawh a ni lo. West Ham an hneh loh ṭuma inkawp Morgan Schneiderlin leh Ander Herrera te midfield-ah an khel ṭha tawk lo a, Louis van Gaal-a'n substitution awmze nei siam a harsat hle.

Red Devils hi West Ham palian lakah an talbuai a, position hrang hranga khel thei Daley Blind-a'n defence laia ding turin thahrui a ngah tawk lo a, United-in Champions League an khelh loh vanga dem tur an neih awmchhun chu anmahni an ni.

Thawnthu ngaihnawm

West Ham manager Slaven Bilic chuan, "Inkhel pawimawh a ni a, chak loh kan hreh a ni. Season ṭha tak hmang mah ila pressure nasa tak kan nei a, kan player-ten hun pawimawha an rilru huaisenna an pho lang a ni," tiin inkhel chungchang a sawi.

Croatian manager chuan sawi zelin, "Stadium ropui tak chungchanga movie siam duh an awm pawn hei aia tawp dan duhawm hi a awm chuang lo. Khingpui club an ropui a, goal nga lawih a lut a, hun tawp lamah goal kan hmuh bakah boruak a sang bawk," tiin Upton Park-a hun tawp dan chu movie ropui tak ang mai a nih thu a sawi.

Result duhawm tak an neih zawh hian West Ham-in stadium thlahna hun an hmang nghal a, halmawi chi hrang hrang nen hun tawp an hmang.

Beiseina

United manager Louis van Gaal chuan, "Hma kan hruai hnuah kan chak lo a, set piece aṭanga goal kan chhuah leh ṭhin vangin kan chak theihna turah kan chak lo. West Ham tan zan danglam bik a ni a, inkhelh ṭan hma leh ṭan hnuah supporter-te'n an ṭawiawm ṭha takzet.

Chutihrualin United chuan khatiang pressure kha a dawl zo tur a ni," tiin buaina vangin chhuanlam a siam lo.

Dutch manager chuan, "Kan result hian kan rilru a tihnual hle a ni. Manchester City hi awlsam takin Champions League khelhtir kan tum lo a, Bournemouth lakah hian kan theihna zawng zawngin kan khel ang," tiin an la beidawn loh thu a sawi.