Benfica chungah Sanches a lawm

Bayern Munich chuan Thawhlehni khan Benfica aṭanga Renato Sanches an lakluh thu an puang a, kum 18-a upa midfielder hian kum nga atan Bundesliga champion tan hian contract a ziak.

Portuguese midfielder Renato Sanches chuan, "Ka thiamna zawng zawng hi helai hmun
aṭanga ka zir a ni a, Benfica leh min puitu zawng zawng chungah lawmthu ka sawi a ni. Bayern jersey hak ka châk tawh a, amaherawhchu chumi hma chuan kan hmabak match pawimawh pahnih kan khelh tur atan ka rilru zawng zawng ka pe ang," tiin a club hlui chungah lawmthu a sawi.

Benfica hian Taca da Liga final-ah Marítimo an hmachhawn ang. Primeira Liga-ah Benfica hi pakhatnaah an awm a, match khat khelh hma-bakah anmahni hnaih bertu Sporting aiin point hnihin an sang zawk. Benfica-in head to head-ah Sporting an tluk loh avangin an match hnuhnung berah champion turin Nacional an hneh ngei ngei a ṭul.

Manchester United chan loh Renato man hi pound maktaduai 27.5 man a ni a, a chet ṭhat dan a zirin a man hi pound maktaduai 63 thlengin a pung chho dawn niin an sawi.