England squad puan hun sawn tlai

England boss Roy Hodgson chuan Thawhṭanni khian European Championship khel tur squad a puang dawn a, ruahhmana hmasaa squad puan hun chu tun Ningani hi a ni.

Player fitness hriat chian nan Premier League round tawp ber a ṭangkai avangin squad puan hun hi sawn hlata ngaih a ni a, UEFA chuan squad thehluh hun atana hun tawp an siam chu May 31 a ni.

England hian inelna ṭan hmain warm up match-ah Turkey, Australia leh Portugal te an hmachhawn ang. Euro 2016 hi June 10 leh July 10 inkara khelh tur a ni a, England hi Russia, Slovenia leh Wales te nen Group B-ah an awm.

Arsenal forward Danny Welbeck chu Pathiannia Manchester City nen 2-2 a an inhnehtawk ṭuma a inhliam avangin a tel theih beisei a ni lo a, club tana akhelhpui Alex Oxlade-Chamberlain pawhin inhliam vang thoin Europe ramte football hmanga inelna sang ber hi a hmachhawn thei lo ang.

Gunners midfielder Jack Wilshere leh Liverpool midfielder Jordan Henderson te chu hun rei tak inhliam hnuah khelmual chhungah an rawn kir leh tawh a, England team-ah an koh ngei a rinawm.

England squad-a ngaihven hlawh lai erawh tlarhma lam a ni a, Leicester forward Jamie Vardy, Tottenham forward Harry Kane, Liverpool striker Daniel Sturridge leh Manchester United captain Wayne Rooney te chu tel tur chiang a ngaih an ni a, Sunderland chhanhimtu Jermain Defoe leh West Ham striker Andy Carroll te dinhmun a chiang lo.