Ropui zawka Terry thlah duh Hiddink

Chelsea manager lailawk Guus Hiddink chuan season tawp ruala chhuak tur anga an sawi captain John Terry chuan ropui zawka thlah leh mangṭha a phu thu a sawi.

Kum 35-a upa Terry hi season tawp rualin a contract a zo tawh dawn a, Blues lam hian contract thar an zawrh loh avangin Terry hian Stamford Bridge chu a chhuahsan mai a ngaih a rin thu lo sawi tawh mah se tun hnaiah Blues-a a hun tawp hman a duh thu a sawi a, manager Hiddink berin in mangṭhana lam thu a sawi leh tak avangin an club legend hi Blues fan-te chuan an mangṭha ngei a ngai dawn niin a lang.

Hiddink chuan, "Terry hi a cham dawn nge dawn lo ka hre lo, mah se he club hi a chhuahsan dawn a nih chuan ropui taka thlah liam a phu a ni," tiin a captain chungchang hi a sawi.

Chelsea lam chuan Terry chungchangah hian thuchhuah engmah an la siam lo a, contract thar an zawrh tur thu erawh an lo sawi fo tawh thung - Blues thusawi hi a dik a nih chuan contract thar inzawrh erawh a hun tawh thung.

Blues hian an club legend Frank Lampard leh Ashley Cole chu in mangṭhana mumal pawh awm loin an lo thlah tawh a, Terry hi ropui taka an thlah lo a nih pawn an club legend dangte laka an chet dan ngaihtuahin thil mak a ni lo ang.