MFA chungchang chhuang takin kan sawi ṭhin - AIFF sr. vice president

Thawhlehni zan khan Mizoram Football Association chuan Tourist Lodge, Chaltlangah All India Football Federation hotute chaw hlui an kilpui a, AIFF senior vice president Subrata Dutta chuan MFA hnathawh chu chhuanawm a tih thu a sawi.

Subrata Dutta chuan, "AIFF-in Mizoram chungchang kan sawi tawh chuan an hnathawh avangin MFA hi chhuang takin kan sawi
ṭhin. MFA hian grassroots football ṭha takin an enkawl a, football hmasawnna atan hna ṭha tak an thawk a ni," tiin Mizoram football thuneitu sang ber a fak.

Federation Cup semifinal inkhel en tura rawn kal Subrata chuan, "Aizawl FC hlawhtlinna hmuh chhoh zel hi ka duh a ni. Season khatnaa an chetdan hi a chhuanawm ka ti a, football-ah chuan hun ṭha leh ṭha lo tawn ṭum a awm a, a tawp thlenga beih fan fan chuan hlawhtlinna chu an la hmu em em ang. Club neitu Robert Romawia Royte-in Mizote tan hna ṭha tak a thawk a, an club kal zelna turah duhsakna ka hlan e," tiin Mizoram aṭanga I League khel hmasa ber Aizawl FC a fak.

Bengali pachal Subrata Dutta hi Kolkatan club George Telegraph neitu a ni a, kum 2014 khan Indian Football Association (West Bengal FA) president atana thlan tlin a ni.

India ram chungchang sawiin Subrata chuan, "Kan ram hian FIFA U17 World Cup hlawhtling taka thlen kan tum a, he inelna hi India ram football hmasawnna atan a pawimawh a ni. U17 World Cup vang hian infrastructure ṭha zawk kan nei dawn a, chu chuan hmalam pan kawngah nasa takin min pui ngei ang," tiin a sawi.

Aizawl FC leh Sporting Goa-te inkhel en tur hian AIFF
aṭangin Subrata Dutta (Sr. vice president), Ankur Dutta (Exe. Comm Member) leh Anil Kamat (Asst GS, Competitions) ten Mizoram an rawn tlawh a ni.