Hazard-a harhtharna! Reds leh Blues inhnehtawk

Chelsea winger Eden Hazard-a'n harhtharna a chan chhunzawm zel a, a match hnu-hnung palia a goal khung pa-lina ni turin Nilaini zan khan Liverpool lamah Blues goal neihchhun a khung.

Anfield-a inkhelah mikhual team tan Hazard-a'n minute 32-naah goal hmahruai a khung a, Reds-in an sut theih lawk loh avangin Blues hi an chak mai dawn niin a lang hman. Mahse, injury time-ah substitute Chris-tian Benteke chuan an si phurh sutna goal khungin team pahnih hi 1-1 in an inhnehtawk.

Hazard a lo kir e!

Season hmasaa PFA Player of the Year-a Eden Hazard thlan a nih hnuah Belgian winger-in ngai a awh leh tawh lo a, hliam vanga a buai fo bawk si avangin season hmasa lawka fak rawn hlawh Belgium international hian sawisel a hlawh nasa hle.

Mahse, April thla thlen hma zawnga goal a khung loh hnuah a ṭhat dan berin Eden Hazard a inlar leh tawh a, Blues goal neihchhun khung turin Liverpool tlarhnung a pal darh a, goal ropui a khung.

Kum 25-a upa winger hian khelmuala hun a hman chhungin vawi 96 lai ball a khawih a, player dang zawng aia ball khawih hnemin a ball pass 95.2% zet a pass dik bawk.

Chelsea tan Hazard-a chet ṭhat hi season chawhnu lam a nih tawh miau avangin awmzia a nei thui lo a, Euro 2016 khel tura inpuahchah mek Belgium tan erawh captain Vincent Kompany awm loh laia captain tur Hazard che ṭha hi chanchin lawmawm a ni.

Liverpool inpuahchahna

Europa League final-a Sevilla hmachhawn tur Liver-pool tan Premier League club ṭha Chelsea hmachhawn hi inpuahchahna ṭha tak a ni.

Anfield-a an match hnuhnung pahniha awlsam taka Villarreal leh Watford hnehtu club hian Hornets (watford sawina) an hmachhawn ṭumin player naupang rual chhawr mah se Blues lakah erawh player ṭha rual an intlar a, inkhel bul pawh an ṭan fuh viau.

Hazard-a goal khung hnuah Reds-in ngai awh lawk lo mah se second half-ah an insiamṭha lehnghal a, Daniel Sturridge leh Kolo Toure-ten an hun ṭha neih chhawr ṭangkai thei ngat se chuan Reds hi chak thei dinhmuna ding an ni.

Chelsea-in hun ṭha nei lo tawp an ni bik lo a, Bertrand Traore leh Pedro-ten awlsam taka goal khung theih nia langah an pet goal lo.

Liverpool si phurh sutna goal khungtu Benteke-a'n tun season Premier League-a goal kua a khung zinga goal ruk chu substitute nichunga a khung a ni a, tun season Premier League-ah substitute bench aṭanga goal khung hnem ber a ni.

Eng nge an sawi?

Liverpool manager Jurgen Klopp chuan, "Zanin kan inkhel result hian kan tan pawimawhna a nei tawh lo. A pawimawh ber chu insiamṭhat kan ngaihna lai hmuhchhuah leh he inkhel
aṭanga inzir hi a ni," tiin a sawi.

Reds manager chuan Liver-pool nuam a tih thu sawi nghalin, "Inkhel bul kan ṭan ṭha takzet a, tlarhnung lama ṭha taka kan khelh zel theih chuan hmasawnna tam tak kan hmu ang. Anfield hi nuam ka ti a, hmun nuam tak leh world-class club a ni," tiin a club enkawl lai a fak.

Chelsea manager Guus Hiddink chuan, "Kan khel
ṭha a, hnehna chan ngei tumin khel mah ila hun tawp lama kan tihsual tuarin point hlu tak kan hloh a ni," a ti.

Dutch manager chuan Hazard chungchang sawi nghalin, "Hazard hi player ṭha tak a ni a, kar engemaw liam ta chhung khan hma a sawn nasa em em a ni. Hliam vangin a buai fo a, a ṭhat dan bera a lo kir leh ta hi ka lawm hle," tiin a player chu a fak.