Italy-ah player langsar an chak vek

Italian Open khelh mekah mipa player langsar Novak Djokovic, Roger Federer, Andy Murray leh Rafael Nadal te chuan Ningani khan an khingpui ṭheuh hnehin second round an paltlang.

Rome champion vawi li lo ni tawh Djokovic-a'n kumina a vawi 34 chakna ni turin Stephane Robert chu minute 87 chhung lekin 7-5, 7-5 in a hneh. World number 1 Djokovic hi kuminah tournament pangaah a champion tawh a, heng zingah hian ATP World Tour Masters 1000 title pathum telin tun ṭumah pawh hian champion tura rinkai a ni.

Britain number 1 Murray-a'n third round lut turin harsatna lian tham a tawk lem lo a, Mikhail Kukushkin chu 6-3, 6-3 a hnehin Jeremy Chardy nen an inhmachhawn zui leh ang. Murray hian kar hmasa khan Madrid Open a thleng a, mahse Djokovic lakah a chak lo thung.

Federer a dam

World number 2 Fede-rer chuan court chhungah a hliam a dam tawh zia lantirin German tlangval Alexander Zverev chu 6-3, 7-5 in a hneh.

A beisei aia a khelh ṭhat thu sawiin Federer chuan, "Set khat pawh la loin ka chak lo tlang nghal mai ang tih ka hlau hle a, mahse beisei phak bakin ka khel ṭha a ni. Tunah chuan ka hnungzâng leh khupah na ka nei rih lo a, naktukah enge lo thleng dawn hre lo mah ila ka dinhmun a ṭha chho zel e," tiin a sawi.

Nadal pawh

Clay court-ah chuan Nadal hi player hlauhawm leh tawhkhirh ber pawh a la ni reng fo. Rome champion vawi sarih lo ni tawh Nadal hian a match hmasa berah Philipp Kohlschreiber chu 6-3, 6-3 in a hneh.

Kum 2014 Wimble-don-ah khan Nadal hian Kohlschreiber hi a lo hneh lo tawh a, mah se an intawn tawhna zawng zawngah erawh ṭum 13 ngawt a chak zawkah a
ṭang tawh thung.