Juventus-ah Gianluigi Buffon a nghet

Juventus goalkeeper Gianluigi Buffon chuan Italian champion tan a rinawmzia lantirin kum 2018 thleng cham turin a contract a pawtsei. A contract hi a hmang zo a nih chuan Juve tan kum 17 chhung zet a khel dawn tihna a ni.

Kum 38-a upa Buffon hian kum 2001 khan Parma aṭangin pound maktaduai 32-in Juve hi a zawm a, khawvela goalkeeper man to ber niin tun thlengin khumtu an la awm lo. Tun season-ah Turin Club hi Serie A title lakpuiin a zawna a kum nga nan league-ah a champion pui.

Italy international Buffon chuan, "He club nen hian thawnthu ropui tak neih chhunzawm zel ka duh a, hlawhtlinna tam zawk neih theih ngei pawh ka beisei," tiin a sawi.

Buffon hian ram tan match 156 khel tawhin tunah hian Euro 2016 khel turin a inpuahchah mek a, a hriselna a ṭhata a khel ṭha tluang a nih chuan 2018 World Cup pawh khelh theih a la inbeisei a ni.

Turin club tana match 579 khel tawh keeper chuan sawi zawmin, "Juve-in ka chungah rinna an nghat ngam hi ka lawm tak zet a, rintlak nih zui pawh ka tum ang," a ti.

Buffon hian tun season-ah a club tan inel-na hrang hrangah match 44 khelin league-ah bik a zawnin minute 973 chhung teh meuh goal a chhuah lo a, Serie A record thar a siam nghe nghe a ni.

Kum 35-a upa defen-der Andrea Barzagli pawhin Juve tan kum 2018 thleng cham tur tho hian contract a pawtsei ve bawk a, Italy tana match 24 khel tawh Barzagli hian kumin Euro zawhah ram tan inkhelh chawlhsan a tum nghe nghe.

Juve hian nomawi pahnih nen season khar theihna hun an nei dawn a, May 21 khian AC Milan nen Coppa Italia final an khel dawn.