Premier League 24 Goals Vardy 25 Goals Kane 24 Goals Aguero Top Scorer

13th May, 2016

Premier League-ah match khat khelh tur la awmin champion bakah relegate club pathum a chiang tawh a. Season tawp zawh hun chauha hriat tur erawh top scorer niin goal 25 khung tawhtu Harry Kane chu Sergio Aguero leh Jamie Vardy ten goal khat chiahin an pha lo.

Tottenham Hotspurs-in St James Park-ah season thara Championship khel tur Newcastle United an hmachhawn dawn a, inkhel awmze nei lo hi Harry Kane-a tan a pawimawh. Manchester City-in Champions League khel turin Swansea lakah point hmuh an mamawh a, Sergio Aguero-a'n top scorer ni turin goal a mamawh bawk. Leicester City-in Stamford Bridge-ah Chelsea an tlawh dawn a, Foxes striker Jamie Vardy tan fiahna a ni ang.

1. Harry Kane : Tottenham striker Harry Kane hian a hna ber chu goal khung a ni tih a chiang a, Arsenal midfielder Mesut Ozil ten teammate-te pass an thlakhlelh em em laiin English striker hi chuan chance a neih phawt chuan goal-a pet mai a hreh lo a, vawi khat chauh assist a la nei hi a mak lo.

Kane hian tun season-ah match 36 khelin goal 25 a khung a, match tina 0.68 goal khung ang a ni. Spurs striker goal 25 zinga 19 hi a ke dinglama a khung niin a lu hmangin vawi khat chiah a khung a, a ke veilamin vawi nga a khung bawk.

English striker hian hattrick vawi khat a siam a, match rukah goal hnih khungin penalty vawi nga a khung bawk. A elpui pahnihte aia match a khelh tam avangin a goal khung ang zat khung ve an awm a nih chuan golden boot a chan ang.

2. Sergio Aguero : Top scorer beiseiawm zinga Sergio Aguero tel hi a mak lo a, Manchester City tana match 29-a khelhah goal 24 khungin amah aia goal khung tam zawk Kane aia player ṭha zawk a nih zia statistics hmangin a nemnghet.

Argentine striker hian New-castle lamah goal nga a khung a, Chelsea lakah hattrick siamin club pathum lakah goal hnih a khung bawk. Aguero hian penalty aṭangin goal li a khung a, assist vawi hnih a nei a, goal 24 khung tur hian shot vawi 88 a nei bawk.

City striker Aguero hian a ke dinglamin vawi 16 a khung a, feet 5 leh inches 8 leka sang ni mah se a lu hmangin goal nga a khung a, a ke vei lamin goal thum a khung bawk.

3. Jamie Vardy : Leicester striker hian hattrick siam miah loh chungin match 35-ah goal 24 a khung a, referee laka chetmawi loh vangin match hnih hrem lo se chuan dinhmun ṭha zawkah a ding thei ang.

Vardy hian penalty vawi nga a pet goal a, Everton lama a penalty pet goal loh erawh a langsar ta hle. Foxes striker hian a ke dinglamin goal 18 a khung a, a ke vei lamin goal li khungin a lu hmangin goal hnih a khung bawk.

Striker goal khung thei pathum zingah assists ngah berin vawi ruk lai a ṭhiante khung tur a siam sak. Vardy hian match 12 chhung a zawnin goal a khung a, Ruud van Nistelrooy-a'n Manchester United tana match 10 chhung a zawna goal a khung tawh record chu a khum. Vardy tan top scorer nih hi a hlu lehzual dawn a, English striker hi a club khelhna Leicester City ang thoin season ṭan hmain chawimawina dawng pha tura rinkai a ni lo.

Goal khung tamte

Player Team Goal

Harry Kane Tottenham 25

Sergio Agüero Man City 24

Jamie Vardy Leicester 24

Romelu Lukaku Everton 18

Riyad Mahrez Leicester 17

Jermain Defoe Sunderland 15

Odion Ighalo Watford 15

Olivier Giroud Arsenal 13

Alexis Sánchez Arsenal 13

Diego Costa Chelsea 12

Troy Deeney Watford 12