Conference semifinals Curry leh Warriors-in Conference Finals lut

Nimin zing khan Oracle Arena-ah Western Conference Semifinals Game 5 khelh niin NBA MVP Stephen Curry chuan Golden State Warriors chu Portland Trail Blazers lakah 125-121 a hnehna chanpuiin series-ah 4-1 in hnehna an chang a, Conference Finals an lut.

Game 4 khelh zawh hnuah Warriors hian 3-1 a hma an hruai tawh avangin Blazers tan Game 5 hi thih thaa an beih a ngai tawh a, quarter thumna zawh dawn thlengin 91-90 a hma an hruai theih avangin beiseina pawh an nei hman.

Mahse, quarter thumnaa minute hnuhnung ber an khelh laiin point guard Curry chuan three points rawn neiin Warriors hian 93-91 in an lehthal. Quarter hnuhnung berah pawh hun tawp rual chiahin Curry-a'n three points a vawm lut leh a, inkhel inhnehtawk taka Warriors-in hnehna an chan theihna chu a zawna MVP ni thei Curry bawk a ni chiang hle.

Warriors tan Klay Thompson-a'n point 33 score-in a thawhhlawk hle a, inkhel pumpuiah Curry chuan point 29 a score bakah assists vawi 11 neiin rebounds ṭum nga a la bawk.

Damian Lillard chuan point 28 score-in Blazers tan a thawhhlawk leh ber a, American point guard hian semifinal inkhel pangaah an team tan a score tam ber tluan zak a, inkhel pangah point 159 zet score thei mah se a
ṭhainten an thlawp ṭhat tawk loh avangin final an lut zo ta lo a ni.

Warriors hian San Antonio Spurs leh Oklahoma City Thunder te inkhela chak zawk zawk chu Western Conference finals-ah an hmachhawn ang. Tunah hian Game 5 khelh tawh niin Thunder hian series 3-2 in hma an hruai mek.

Semifinals Thlirna Tawi

Blazers 106 - 118 Warriors

Blazers 99 - 110 Warriors

Warriors 108 - 120 Blazers

Warriors 132 - 125 Blazers (OT)

Blazers 121 - 125 Warriors

Series-ah Warriors 4-1 in an chak