AFC Cup India club an mualpho, Bagan leh Bengaluru chak lo

Nilaini zan AFC Cup-ah India club lian pahnih Mohun Bagan leh Bengaluru FC an inlan a, an khingpui lakah goal thum ve ve chhuahin team pahnih hi an chak zo lo.

Player ṭha tam zawk hahchawlhtir chunga khel Mohun Bagan-in an mikhual South China chu 3-0 in an hneh lo a, Bengaluru chuan an mikhualna ramah champion lai Johor Darul Ta’zim chu 3-0 in an hneh lo bawk.

Indian club pahnihte hian chak result hlawh chhuak zo lo mah se last 16 an luh chian tawh avangin an result hian awmzia a nei thui lo.

Bagan an tlawm

Indira Gandhi Athletic Stadium, Guwahati-a inkhelah Mohun Bagan-in an player tam zawk an chawlh hahdamtir a, player langsar zingah striker Jeje Lalpekhlua leh Katsumi Yusa-ten inkhel bul ṭan mah se Sony Norde leh Cornell Glen chu Guwahati-ah hruai tel an ni lo.

Mohun Bagan-in chak lo mah se group hmahruaitu nichungin last 16 an lut tawh tho tih an chian avangin an theihna zawng zawng nen an khel chhuak lo a, mikhual team South China-in first half-ah goal thum hi an khung nghal.

Hong Kong club hian an khelmuala 4-0 a an lo hneh loh tawh hnu club lakah hian mikhual ze ṭha chhuah duh loin Law Hiu Chung (19'), Ryan Griffiths (24') leh Mahama Awal (33')-te hmangin goal an khung a, Bagan-in a chhanletna goal an khung theih loh avangin 3-0 in Kolkata club an tlawm.

Bagan Hmabak

Mohun Bagan hian Singapore club Tampines Rovers FC chu last 16-ah an hmachhawn dawn a, Guwahati-ah Liverpool winger hlui Jermaine Pennant-a khelhna club hi an hmachhawn ang.

AFC Cup last 16 hi double leg a khelh a ni dawn lo a, group tina hmahruaitu chu duhsak niin last 16-ah hian an home-ah ṭheuh an khel dawn. Kolkata club hi Group G-ah hmahruaitu an nih avangin last 16-ah mualneitu team zawkah an ṭan theih phah dawn a ni.

Mohun Bagan hian last 16-a an hmachhawn tur Singapore club hi Asian Champions League (ACL) play-off ah 3-1 a an lo hneh tawh avangin an huphurh lutuk lo ang.

Chak thei lo Bengaluru

Bengaluru-in an club chanchina a vawi khat nan match thum chhung a zawnin an khingpui an hneh lo a, Federation Cup-ah a zawna Aizawl FC an hneh loh hnuah AFC Cup khel lehin Johor Darul Ta’zim lakah 3-0 in an tlawm.

Last 16 lut chiang tawh team pahnih inkhelah hian Malaysian club-in an player ṭhate an chawlh hahdamtir a, Bangalore club-in an player neih ṭhat dan ang berin an khel thung.

Bengaluru-in an mikhualna ramah first half chhung zawng goal chhuah lo mah se second half-ah an ṭang tlang zo lo a, Malaysian club tan Safiq Rahim (70'), Safee Sali (78'), ShakirShaari (90'+) ten goal khungin Bangalore club an mualpho.

Champion lai Johor Darul Ta’zim-in match ruk inkhel an hmachhawn tawhah hnehna la chang fai vekin Gourp H-ah hma an hruai chiang hle.

Daniel a inlan

Bengaluru FC-in Johor Darul Ta’zim an hma-chhawnna inkhelah Mizo tlangval Lalchhuanmawia Fanai chuan inkhel bul a ṭan a, Chaltlang rawlthar Malsawmzuala leh goalkeeper Lalthuammawia Ralte-te chuan bench-ah an hun an hmang tluan thung.

Nilaini zan an inkhelh hma hian Bengaluru striker Daniel Lalhlimpuia chu a pa LH Zohmingliana'n a thihsan a, Malaysia-ah inkhel tura a awm avangin Serchhip rawlthar hian a pa ruang a thlah ve hman lo.

Hetichung hian Mizo striker beiseiawm hi minute 73-naah khelmual chhungah a tlan lut a, a pa an thlah zanah Bengaluru tan India U19 captain hlui hian AFC Cup-a khel a, khelmualah a talbuai lo.

Bengaluru Hmabak

Group H-ah pahnihna an nih avangin Bengaluru hian last 16 chu khualmualah an khel dawn a, Hongkong club Kitchee SC chu May 24 khian an lenchilh ang.

Indian club zingah AFC Cup nomawi chawi thei an la awm lo a, East Bengal leh Dempo-te chuan semifinal thleng tawhin anni pahnih hi Indian club zinga thleng sang ber an la ni.