Mumbai hmaah Bangalore an tlawm

Nilaini zan Indian Premier League inkhelah Mumbai Indians chuan wicket rukin mualneitu Royal Challengers Bangalore an hneh a, Kieron Pollard leh Jos Buttler-te chu mikhual team chakpuitu an ni.

M.Chinnaswamy Stadium, Bengaluru-a inkhelah Bangalore-in over 20 chhungin run 151 an siam a, mi pali an hloh. Bangalore tan captain Virat Kohli (7 runs) chet ṭhat loh zanah Lokesh Rahul chuan a tawp thleng damin run 68 a siam a, batsman che ṭha ṭhang zingah run 24 siamtu AB de Villiers-a chet ṭhat bawk si loh avangin Lokesh Rahul-a chet ṭhatin awmzia a nei thui lo.

Mumbai Indians-in over 18.4-ah run 153 siamin an target an umpha der a, mi pali chiah an hloh. Mumbai tan Ambati Rayudu-a'n run 44 a siam hnuah Kieron Pollard (35 runs, 19 balls, not out) leh Jos Buttler (29 runs, 11 balls, not out) ten an hna ṭha takin an thawh a, mikhual team-in wicket rukin hnehna an chang.

Zanin Indian Premier League inkhelah match khat chiah a awm dawn a, zan dar 8:00 hian Mumbai Indians leh Kings XI Punjab-te an inhmachhawn ang.