Frank De Boer-a'n Ajax a chhuahsan

Ajax manager ṭanglai Frank de Boer chuan kum 2017 July thleng cham turin contract nei mah se club nena inhriatthiam tawnnain Amsterdam Arena a chhuhsan.

Kum 45-a upa De Boer hian kum 2010 December khan Martin Jol thlakin Ajax hi a enkawl ṭan a, a zawnin season li chhung Duth league-ah champion pui nghalin fak a hlawh hle. Mahse, tun hnai kum hnih chhungin Eredivisie-ah PSV Eindhoven an tluk lo.

Tun season-ah Ajax hi an vanduai hle a, season tawp ni thlengin hmahruaitu ni mah se an match hnuhnung berah De Graafschap nen 1-1 a an inhnehtawk avangin PSV kutah league nomawi a awm phah.

Netherlands international hlui De Boer chuan, "Hun hlimawm tak ka lo hman tawhna ṭhin ka chhuahsan tur hi ka lungngai hle a, mahse kan theihna zawng zawng kan seng chung pawha ka duh leh tum kan thlen theih tak lohah chuan thil thlak danglam a ṭul ta a ni," tiin a sawi.

Barcelona tana match 144 lo khel tawh De Boer hian 2007-10 khan Ajax youth team a lo enkawl tawh a, hemi hnu hian kum hnih chhung Netherlands assistant manager-ah a lo ṭang tawh bawk.

De Boer hi Ajax a chhuhsan hnu lawk hian Premier League club Everton nen sawizawm nghal a ni a, fan-te lawm hlawh tawh lo Roberto Martinez dinhmun ti derthawng zualtua ngaih a ni.