Dan theih loh Ibrahimovic

Zlatan Ibrahimovic chuan tun season-ah Paris St-Germain tan Ligue 1-ah match 30 a khelh aṭangin goal 36 a khung tling ta a, club record thar siam thei dinhmunah a ding leh ta.

Nilaini zan Ligue 1 inkhelah Paris St-Ger-main leh Bordeaux te 1-1 in an inhnehtawk a, PSG goal hi Angel di Maria siamsak hmanga minute 59-naa Ibrahimovic khung a ni, Bordeaux tan Nicolas Pallois chuan an si phurh a sut ve leh bawk.

Sweden international Ibrahimovic hian tun season-ah league goal 30 khung tling tawhin season khat chhunga PSG tana goal khung hnem ber Carlos Bianchi (37) record a nihrual teuh tawh hle a, Inrinni zan hian Nantes an mikhual zui dawn avangin hnuhma ropui hnutchhiah thei dinhmunah a ding mek.

Kum 34-a upa Ibra hian Paris-ah kum li hun a hman chhungin inelna hrang hrangah goal 152 khung tawhin PSG tana goal khung hnem ber a ni der tawh a, seson tawp rual hian a contract a zawh tawh dawn avangin club dang a zawm rin a ni.

PSG hian league-ah point 93 hmu mekin French Ligue 1 chanchin-ah season khat chhunga point hmu hnem ber record an siam tawh a, an record tih san theihnan inkhelh hmabak pakhat an la nei cheu bawk.